Dikur i shikoje me puro, vetull të ngritur dhe vështrim sfidues. Sot, këta gangsterë që edhe rivalizonin njëri-tjetrin janë bërë të ndjeshëm si Romeo, romantikë si Shekspiri dhe besnikë si pinguini.
OK. E ekzagjeruam paksa edhe me pinguinin, por ju e kuptoni ku e kemi fjalën, apo jo?
Përshembull Getoari. Ai është i pari që të vjen në mendje kur mendon gangsterë që janë zbutur nga dashuria. Lideri i Babastars kaloi nga “Oh, sa kam b*thën e mirë” tek “Nata është e jotja shpirt, të priftë e mbara.”
Në fakt po ta mendosh, Getoari s’ka qenë ndonjëherë sherrxhi i madh, sado që sherre mes Babastars dhe OTR ka patur plot kohët e fundit. Megjithatë, që pas lidhjes dhe martesës me Marinën duket se e ka lëshuar pëllumbin e paqes nga kafazi dhe e ka lënë të fluturojë.
Sot, Stresi i famshëm për sherret dhe hyrje-daljet në burg, deklaroi se ka vendosur të lërë hashashin dhe s’do të sillet keq me policët. I ftuar tek “Pop Culture”, Stresinjo tregoi sa shumë ka ndryshuar që kur u fejua me Kejsin dhe ndonëse s’e pranoi që shkaku të jetë ajo, tha se me moshën ka mësuar ta mbajë gojën dhe madje ka fshirë nga Youtube-i gjithë këngët e vjetra, ku shante kundërshtarët.
Ai po e mendon seriozisht martesën dhe e dini çfarë do ta ketë fëmijën e parë? Vajzë!
Edhe Cozman, që dikur këndonte “Dhipi shumë i smut”, u duk shumë romantik pas ndarjes nga Tuna, me të cilën pati një lidhje ndahu-pajtohu për tre vite që prej 2013-ës.
Pak kohë pasi lajmi i ndarjes përfundimtare pushtoi mediat, Cozman do të publikonte këngën “Si dje”, një baladë që i dedikohej një dashurie të humbur.
Megjithatë, vitin e kaluar iu kthye prapë sherreve duke u përfshirë në një përleshje me armë mes disa pjestarëve të Babastars dhe Noizy-t.
Po edhe Mozzik-u ose siç e quan veten, “Tony Montana”, duket goxha i përfshirë me të dashurën, Loredanën. Ai që “ia lodh zemrën” bjondinës së vet “si me pi 10 Red Bull-a”, di të bëhet kaq romantik në postime publike:
“Nuk ka gjë më të bukur në jetë se të gjesh një njeri që të lexon pa shkronja dhe të kupton pa fjalë!”