Pas reshjeve të para të dëborës në fillim të dhjetorit në zonat veriore dhe juglindore të vendit, Autoriteti Rrugor Shqiptar po vijon punën për mirëmbajtjen dimërore të rrugëve. “Kompania e mirëmbajtjes së rrugës së Dardhës në Korçë ka bërë pastrimin e rrugës dhe trajtimin me kripë”, – bën të ditur ARRSH.
Sipas ARRSH-së, qarkullimi vazhdon normalisht, pa zinxhir në rrugën që lidh Korçën me fshatin turistik të Dardhës. Fillimi i muajit dhjetor u shoqërua me reshjet e para të dëborës në zonat malore dhe juglindore të vendit. ARRSH ka marrë të gjitha masat e para të mirëmbajtjes dimërore dhe ka nisur puna për pastrimin e saj dhe hedhjen e kripës.
Dardha, 19 kilometra në juglindje të Korçës, në një lartësi gjeografike mbi 1300 m, po frekuentohet gjithnjë e më shumë nga pushuesit, që zgjedhin pikërisht atë për të kaluar fundjavën në të gjitha stinët.
