18 ditë pasi ndërroi jetë në një spital të Italisë, 21 vjeçarja Anxhela Meçani do të prehet në vendlindje.
Trupi i pajetë ka mbërritur pranë familjarëve në Fier dhe sipas agjensisë funerale që ka bërë transportin është i dëmtuar në 70% të tij.
Familjarët, të cilëve iu desh të përjetojnë gjatë dhimbjen, kërkojnë drejtësi dhe zbardhje të ngjarjes. Gjyshi Isa Veizaj dhe babai Dritan Meçani apelojnë që autori të marrë dënimin maksimal.
Veizaj: Për herë të parë krijoj një urrejtje për personin që ka kryer këtë akt makabër në Itali. Nuk e njoh as më njeh, dua të marrë dënimin më maksimal nga gjykata. Ia lëmë gjykatës dhe prokurorisë për të dhënë meritën e fundit të gjykimit.
Meçani: Krimineli i kësaj çështje të penalizohet me dënimin më të rëndë, nisur nga krimi i ashpër dhe dhimbjet që na ka dhënë neve.Do ta ndjek çështjen derisa të marrë drejtësi.
Anxhela Meçani u nda nga jeta në 10 qershor të këtij viti. 20 vjeçarja sipas mediave italiane u dhunua dhe u hodh në rrugë nga një makinë në qytetin e Torinos, ndërsa ndërroi jetë në spital si pasojë e plagëve të marra.
Meçani ishte larguar drejt Italisë në muajin dhjetor bashkë me një të ri nga Fieri, i cili në një bisedë me një të afërme të 20 vjeçares thotë se atje viktima ishte celebruar me një italian për dokumente. Emri i tij nuk bëhet i ditur, por sipas këtij regjistrimi, dëshmitari mohon që e reja të punonte si prostitutë, variant ky i publikuar nga mediat italiane.
