Një skenë e ngjashme me ato të filmave aksion ka qenë atentati me armë ku mbeti i plagosur 33-vjeçari Romeo Meçaj mbrëmjen e të shtunës, (5 mars 2022) në Vlorë.
Pamjet tregojnë momentin kur ndaj automjetit ku ndodhej i riu është qëlluar me breshëri të paktën 15 herë teksa edhe autorët ishin në ecje. Ata kanë përdorur një makinë Golf 5 të cilën e dogjën disa minuta pas ngjarjes në zonën e Ujit të Ftohtë
Kamerat kanë fiksuar momentin kur goditja është kryer nga dera e parë e pasagjerit të makinës.
Zjarri i automatikut që sipas policisë ka qëlluar të paktën 15 herë dallohet qartë në këtë video, ndërsa edhe në vendngjarje në një distancë prej mbi 15 metrash janë gjetur 15 gëzhoja.
I prekur nga plumbat në pjesën e gjoksit pranë zemës dhe në gjymtyrë, Romeo Meçaj, ka humbur kontrollin e mjetit duke u kthyer majtas ku është përplasur me automjetin e një banori të zonës që ishte parkuar aty pranë.
Deri në këtë fazë të hetimit policia kriminale e Vlorës, beson se tentativa e vrasjes së Meçaj, është organizuar më shumë se tre persona, dy në makinën e përdorur për të ndjekur e goditur viktimën dhe i treti, në vendin e quajtur zona e “7 Pallateve” në “Uji i Ftohtë”.
Aty është djegur makina e përdorur në atentat ndërkohë autorët kanë marë një mjet tjetër për tu larguar duke humbur gjurmët.
Sipas policisë, makina tip “Golf 5” e përdorur në atentatin kundër 33-vjeçarit, rezultoi se ishte vjedhur në qytetin e Lushnjës.
