Pse fëmijët e ish kryeministres së Britanisë nuk pranojnë më të gjenden në një ambjent me njëri-tjetrin?
Vajza 62-vjeçare e ish kryeministres së Britanisë, Margaret Thatcher, Karol Thatcher, vendosi të nxjerrë në ankand, mes Shtëpisë Christie’s, mbi 400 sende personale të nënës së saj.
Mes sendeve dhe orendive, ka bizhuteri, suvenire, shënime dore të ish presidentit të Amerikës Roland Regan, të cilin e lidhte një miqësi shumë e ngushtë me “Zonjën e Hekurt” të Britanisë, si dhe shumë aksesorë që Thatcher përdorte për të plotësuar shfaqjet e saj.
Ankandi që pritet të organizohet, vlerësohet se do të kalojë shumën 700 mijë euro. Por, vëllai binjak i Karolës, Mark Thatcher, sipas disa deklaratave të miqve të tij në shtypin britanik, thuajse u çmend kur u njoh me vendimin e motrës së tij, për të nxjerrë në anakand sendet personale të nënës së tij, që qeverisi me “grusht të hekurt” Britaninë nga viti 1979 deri në vitin 1990.
Mark Thatcher cilësoi aktin e motrës së tij si “të neveritshëm” dhe, sipas deklaratave të miqve të familjes, nuk pranon më të gjendet me Karolën as edhe në të njëjtin mjedis. Ai vetë ka thënë se mban sende personale të nënës së tij, por që kurrë nuk do i shesë, në respekt të kujtimit të saj. Përgjegjësja e shtëpisë Christie’s, Meredith Etherington-Smith, deklaroi se mes sendeve të Margaret Thatcher që do të dalin në ankand është edhe fustani i saj i nusërisë, ndërkohë që vlerë të madhe do të kenë aksesorët, akoma edhe kopsat e veshjeve të saj, pasi ish kryeministrja, vajzë rrobaqepseje, shpesh thoshte se ka mësuar nga e ëma se, një aksesor transformon edhe një veshje të thjeshtë, në të mrekullueshme.
