Muaji prill ka vazhduar me rritje të çmimeve për një pjesë të mirë të mallrave të shportës, duke e çuar inflacionin në 2,1 për qind.
Instituti i Statistikave shpjegoi se ndikimin më të madh në rritjen e përgjithshme të çmimeve e dhanë rritja e çmimeve të ushqimeve dhe ujit. Krahasuar me tendencën e çmimeve të një viti më parë, sipas Institutit të Statistikave inflacioni u rrit me 0,2 për qind nga 1,9 për qind që ishte në 2017.
Krahasuar me çmimet e muajit mars, inflacioni është 0,1 për qind më i lartë. Rritja e inflacionit vijon të shënohet në një kohë kur euro është zhvlerësuar.
Zhvlerësimi i euros ka sjellë efekte negative te eksportuesit, pasi çmimet e tyre janë ulur, ndërsa për importet ato bëhen më të lira në periudhën që euro ka pësuar rënie. Rënia e euros nuk ka sjellë rënie të çmimeve, çka do t’u jepte mundësi konsumatorëve të zëvendësonin blerjen e produkteve më të shtrenjta me produktet më të lira, që vijnë nga importi.
RRITJA E ÇMIMEVE
Rritja e çmimeve të përgjithshme për muajin prill ishte 2,1 për qind. Ndikimin më të lartë në këtë rritje të çmimeve e kanë dhënë ushqimet, uji dhe qiratë. Instituti i Statistikave raporton se rritja vjetore e çmimeve në muajin prill është ndikuar kryesisht nga grupi “Ushqime dhe pije joalkoolike” me 1,2 për qind. Çmimet e grupit “Qira, ujë, lëndë djegëse dhe energji” kanë kontribuar me 0,52 për qind.
Çmimet e grupit “Veshje dhe këpucë” kanë kontribuar me 0,12 për qind. Rritje çmimesh kanë pësuar edhe grupi i “Pije alkoolike dhe duhan” dhe “Transporti” me 0,06 për qind secili.
Çmimet e grupeve “Argëtim dhe kulturë”, “Hotele, kafene dhe restorante” dhe “Mallra dhe shërbime të ndryshme” kanë kontribuar me 0,03 për qind. Çmimet e grupeve “Komunikimi” dhe “Shërbimi arsimor” kanë kontribuar me 0,02 për qind. Edhe çmimet e grupit “Shëndeti” u rritën me 0,01 për qind.
Ndërsa ndryshimet vjetore të grupeve kryesore krahasuar me muajin prill 2017, rritja më e madhe e çmimeve vërehet në grupin “Veshje dhe këpucë” me 3,4 për qind, pasuar nga grupet “Ushqime dhe pije joalkoolike” me 3,1 për qind.
Brenda grupit të ushqimeve çmimet e nëngrupit “Zarzavate përfshirë patatet” u rritën me 11,7 për qind, pasuar nga nëngrupet “Fruta” me 9,9 për qind, “Peshk” me 2,7 për qind etj. Nga ana tjetër, çmimet e nëngrupit “Kafe, çaj dhe kakao” u ulën me 1,6 për qind pasuar nga “Sheqer, reçelra e ëmbëlsira” me 0,7 për qind.
