Dy njerëz që kanë dijeni mbi hetimet për çështje financiare të ish-avokatit personal të Presidentit Donald Trump, Michael Cohen, thonë se avokatët e tij janë në negociata me prokurorët që mund të rezultojnë shumë shpejt në një marrëveshje për pranimin e fajësisë nga zoti Cohen.
Sipas pesonave në fjalë që komentuan në kushte anonimiteti, Cohen mund të pranojë fajësinë në gjykatën federale të Manhatanit, nëse është arritur një marrëveshje që kërkon si shkëmbim bashkëpunimin e tij me qeverinë.
Michael Cohen ishte avokati personal i Presidentit Trump deri para disa javësh.
Prokurorët po e hetojnë atë prej muajsh për mashtrime të mundshme që lidhen me bizneset e tij. Më 9 prill FBI-ja bastisi dhomën e tij të hotelit, shtëpinë dhe zyrën, duke tërhequr prej andej më shumë se 4 milionë dokumente dhe objekte të tjera.
VOA
