Shtetet e Bashkuara të Amerikës ka tejkaluar shifrën e 200 mijë të vdekurve, për shkak të koronavirusit.
SHBA është shteti që ka numrin më të madh të viktimave nga Covid-19 në të gjithë botën.
Sipas mediave botërore, SHBA po humbet deri 800 njerëz në ditë për shkak të Covid-19. Kulmi i të vdekurve për shkak të koronavirusit në SHBA u regjistrua më datë 15 prill, kur u shënuan 2 806 viktima në një ditë të vetme, raporton Reuters.
Gjatë muajve të parë të pandemisë, ekspertët thanë se në SHBA, maksimalisht 200 mijë persona mund të humbasin jetën nga pandemia e koronavirusit.
Të hënën, presidenti i SHBA-ve Donald Trump tha se ai kishte bërë një punë fenomenale për të ndaluar pandeminë e koronavirusit, që ka infektuar gati 6.9 milionë amerikanë.
Trump ka pranuar se ka minimizuar rrezikun e koronavirusit më herët, sepse ai nuk ka dashur të “krijojë panik”.
Kur kanë mbetur edhe më pak se 6 javë nga zgjedhjet në SHBA, të cilat zhvillohen më 3 nëntor, presidenti Donald Trump është më dobët se rivali i tij për postin Joe Biden.
Donald Trump shpesh ka vënë në dyshim këshillat e ekspertëve shkencorë për gjithçka, nga mundësia për të prodhuar një vaksine te rihapja e shkollave dhe bizneseve deri te mbajtja e maskës. Ai ka refuzuar të mbështesë një mandat të maskës kombëtare dhe ka mbajtur tubime të mëdha politike ku pak njerëz kanë mbajtur maska.
