Ka filluar sot në ora 10:00, procesi i vaksinimit në Maqedoninë e Veriut, të parat që u vaksinuan janë: Dobrinka Nounova Naunovska specialiste, Gabriela Gemelkovska, Kryeinfermierja ne Klinikën Infektive dhe Ana Anastasovska, Infektologe ne Kliniken Infektive.
Ato u shprehen se ndiheshin mirë dhe nuk kishin pasur asnjë problem.
“E pranova vaksinën dhe ndjehem mirë. Apeloj deri tek të gjithë qytetarët që të mos hamenden, sepse kjo është mënyra e vetme për tu përballur me këtë pandemi. Sot pranuam dozën e parë, pas 21 ditëve do të marrim edhe dozën e dytë. Imuniteti arrihet për 2 deri 3 javë”, tha njëra nga infermieret që u vaksinua sot.
Ndërkohë ministri i Shëndetësisë Venko Filipçe, i pyetur pse nuk është në mesin e të parëve për të marrë vaksinën ashtu siç kishte deklaruar më parë, u përgjigj se prioritet kanë mjekët të cilët janë në vijën e parë të frontit. Sipas tij pritet që punonjësit shëndetësorë të vaksinohen për 7-10 ditë.
“Kapaciteti i vaksinimit është 6 punkte, maksimalisht 500 persona në ditë, ne do të filloj me një orar prej 300-350. Kështu që për një periudhë prej 7-10 ditëve do të vaksinohen të gjithë punonjësit shëndetësorë”, tha Filipçe.
Serbia dhuroi 200 mijë vaksina kineze të kompanisë Sinopharm për Maqedoninë e Veriut, ndërsa gjatë muajit mars pritet të vijnë edhe 800 mijë vaksina të kompanisë Astrazeneca.
