Qindra banorë të bashkisë së Saviano në Itali kanë vërshuar në rrugët e qytetit për t’i dhënë lamtumirën e fundit kryebashkiakut të tyre Carmine Sommese, i cili vdiq pasi u prek nga koronavirusi.
Siç shihet dhe nga pamjet, edhe pse është e ndaluar dalja nga shtëpia, banorët e Savianos kanë vërshuar në rrugë për kryebashkiakun e tyre. Carmine Sommese përveç postit si kryebashkiak punonte dhe si mjek në spital për të ndihmuar në vijën e parë të luftës me covid-19. Fatkeqësisht virusi të cilin po luftonte bashkë me kolegët i mori jetën dhe atij vetë, raporton newsbomb.al.
Presidenti i rajonit të Campanias Carlo Marino, i ka shkruar një letër ngushëllimi familjarëve të kryebashkiakut të ndjerë dhe Bashkisë së Savianos.
“Lamtumirë Carmine Sommese, Kryetar i Bashkisë Saviano. Lamtumirë një burrë dhe një administrator që ka paguar personalisht për angazhimin përkrah komunitetit të tij, si Kryetar dhe Mjek, në këto periudha të vështira nga vuajtjet e infeksionit.
Gjithmonë i disponueshëm dhe i qeshur. Do të na mungojë angazhimi i tij qytetar, i vëmendshëm dhe skrupuloz dhe cilësitë e tij njerëzore, të cilat, megjithatë, do të mbeten të pashlyeshme në kujtesën e bashkëqytetarëve dhe pacientëve të tij. Për familjen dhe administratën komunale të Saviano, të prekur kaq rëndë, i drejtohem me ngushëllimet e mia të përzemërta”, thuhet ndër të tjera në mesazhin e Presidentit të rajonit të Campanias Carlo Marino, për vdekjen e kryebashkiakut të Savianos Carmine Sommese.
