Gjatë periudhës së verës, Austria mund të lejojë hyrjen e turistëve nga Gjermania dhe vendet e tjera që e kanë koronavirusin nën kontroll, deklaroi ministrja e Turizmit, Elisabeth Koestinger. Gjermania është tregu më i madh i klientëve për industrinë e turizmit në Austri, që numëroi më shumë se 30% të mbërritjeve të turistëve gjatë sezonit të verës së vitit të kaluar, sipas statistikave zyrtare.
“Liria për të udhëtuar do të mbetet e kufizuar në muajt e ardhshëm. Megjithatë, nëse vendet janë në rrugën e duhur, si Gjermania, ekziston një mundësi e vërtetë për marrëveshje bilaterale”, theksoi Koestinger. Ministrja deklaroi se shumë austriakë do të konsiderojnë pushimet verore në vendin e tyre për shkak të pandemisë dhe jo në destinacione popullore si Italia apo Greqia. “Megjithatë, pa vizitorë të huaj, do të duhet të përballemi me humbje”, shtoi Koestinger.
