Koronavirusi nuk bën dallime dhe mund të prekë këdo. Një tjetër provë për këtë është edhe numri i fëmijëve nën 1 vjeç që janë prekur nga Covid-19 në Shtetet e Bashkuara të Amerikës.
Sipas drejtoreshës së Shëndetit Publik të qytetit Corpus Christi në Teksas, Annette Rodriguez, janë 85 bebe të infektuara deri më sot.
“Për momentin kemi 85 bebe më pak se 1 vjeç që kanë dalë pozitivë me koronavirus”, tha Rodriguez për Europa Press.
“Janë fëmijë që nuk kanë mbushur ende 1 vjeç. Ju lutem, na ndihmoni që ta ndërpresim përhapjen e virusit”, u shpreh Rodriguez, e cila nuk dha detaje për gjendjen shëndetësore të këtyre fëmijëve.
Teksasi është një nga vatrat kryesore të koronavirusit në SHBA, vendit më të goditur në botë nga pandemia. Në Teksas numërohen mbi 319 000 raste të konfirmuara dhe 3384 viktima dhe rritja e numrit të fëmijëve të prekur ka ndezur alarmin.