Agjencia e Shërbimeve Funerale pranë bashkisë së kryeqytetit ka kërkuar sot që të blejë 136 arkivole. Në njoftimin e tenderit, Agjencia thotë se arkivolet po i blen në kuadër të masave për përballimin e pandemisë covid-19 në Shqipëri, virus i cili deri më sot ka shkarkuar 27 viktima.
Tenderi i specifikuar pikërisht për covid-19 shpallet në një kohë kur epidemia po mbahet nën kontrollon për shkak të zbatimit të masave të ndërmarra nga autoritetet shtetërore, me përjashtim të Krujës, ku ka një përhapje të infeksionit në fasoneri. Megjithatë, qeveria i ka kërkuar Kuvendit që të vendosë shtyrjen e gjendjes së fatkeqësisë natyrore deri në 23 qershor të këtij viti. Propozimi është miratuar nga Komisioni i Ligjeve, ndërsa pritet të finalizohet në Parlament, gjatë seancës së ardhshme.
Ndërkaq, në dokumentet e tenderit të shpallur gjatë ditës së sotme, thuhet se “mallrat do të dorëzohen në magazinën e autoritetit kontraktor që ndodhet në Rr.‘‘Ymer Ndregjoni afër Poliklinikës nr. 10, për verifikim nëse u përgjigjen specifikimeve të autoritetit kontraktor. Operatori ekonomik i renditur i pari, duhet të paraqitet pranë autoritetit kontraktor brenda ditës se nesërme të punës nga momenti i shpalljes fitues”. Agjencia e Shërbimeve Funerale thotë gjithashtu se “afati i lëvrimit të mallit/realizimit të shërbimit/punës do të jetë 21 dite pune, duke filluar nga data e paraqitjes në institucion”.
