Vijon të mbetet mister identiteti i dy bosëve shqiptarë të arrestuar në Spanjë për ngarkesën 1 ton kokainë e ardhur nga Kolumbia në vendin iberik. Mediat spanjolle i kanë identifikuar dy trafikantët shqiptar si Dritan Gradica dhe Julian Deblini. Policia spanjolle tha dy ditë më parë se banda e trafikut të kokainë drejtohej nga dy shqiptarë.
Teksa mediat spanjolle shkruajnë se autoritet spanjolle kanë kërkuar informacion nga pala shqiptare për lidhjet e tyre në vendin tonë, nga ana e Policisë Shqiptare nuk jepet asnjë informacion për identitetin e tyre. Nga verifikimet e bëra rezulton në Shqipëri me këtë identitet vetëm një shtetas. Dritan Gradica, që korrespondon me identitetin e të arrestuarit në Spanjë, është 43 vjeç lindur në Kukës dhe banues në Tiranë.
Ai rezulton se është djali i ish-gjyqtarit të Apelit, Shaqir Gradica, i cili tashmë ka dalë në pension. Gjyqtari Gradica është një personazh i njohur në sistemin e drejtësisë me një karrierë të gjatë në gjyqësor si pjesë e Gjykatave të Apelit.
Pasi u kontaktua me telefon ish-gjyqtarin Gradica, që tashmë punon si avokat i lirë, por ai ka mohuar që personi i kapur në Spanjë është djali i tij. Dyshimet e ngritura deri më tani janë se një tjetër person të ketë përdorur identitetin e Dritan Gradicës.
Por kjo pistë do të mbetet mister deri në momentin që Policia e Shtetit do të veprojë për zbardhjen e kësaj ngjarje, apo të paktën do të informojë opinionin publik nëse ka ndërmarrë ndonjë hap për të identifikuar dy shtetasit shqiptar të arrestuar në Spanjë si bosët e trafikut të një ton kokaine.
Nga burime konfidenciale, eshte arritur të mësohet se shtetasi Dritan Gradica rezulton të ketë hyrë me makinë në Shqipëri në datën 18 janar 2018 nga pika e Kakavijës. Vetëm 8 ditë më vonë në datën 26 janar, po nga e njëjta pikë kufitare është larguar sërish por këtë herë në këmbë dhe jo me makinë.
Sa i përket shtetasit Julian Deblini, i identifikuar si shqiptari i dytë i arrestuar. Ky emër nuk rezulton i regjistruar në Regjistrin e Gjendjes Civile. Për këtë shtetas ka dyshime se ai është me kombësi shqiptare por shtetas kosovar.
Që prej tre ditësh mediat spanjolle vijojnë të shkruajnë për operacionin “Start”, ku u kapën 1 ton kokainë dhe 1. 5 milionë euro. Ky rrjet drejtohej nga shqiptarët, të cilët sipas mediave spanjolle kishin arritur të bënin pjesë të organizatës dhe punonjës të një aeroporti në Kolumbi nga ku nisej kokaina.
