Vaksina e koronavirusit është tema më e diskutuar në të gjithë globin dhe e ka ndarë opinionin publik. Madje mitet për vaksinën janë të shumta, ku ka prej atyre që e mbrojnë dhe të tjerë që e cilësojnë si hap të gabuar.
Mjekët pranojnë debatin dhe sqarojnë pikëpyetjet e mëdha që njerëzit kanë ndaj vaksinës. Mjeku i njohur, Albert Troci, ishte sot në një lidhje live me emisionin “Shqipëria Live”, ku edhe njëherë tha se është vaksinuar.
Sipas tij, vaksina mbron deri në 95 për qind. “Unë që jam vaksinuar, nëse më ndodh të infektohem, do të thotë se ose nuk e kuptoj, ose e kaloj shumë lehtë. Vaksina ul numrin e vdekjeve, numrin e infektimeve dhe numrin e të shtruarve në spital”, tha mjeku që jeton dhe punon në Itali.
Troci shtoi se vaksina që të jetë aprovohet, duhet të ketë mbi 50 për qind efektivitet. “Vaksina e gripit për shembull është mbi 50 për qind efektive”, tha mjeku.
Ndërsa i pyetur nëse në Itali kanë hyrë variantet e reja të Covid, mjeku u shpreh se “po”.
“Këtu është bërë një studim i shpejtë, ku në disa zona ka arritur 90 për qind varianti anglez, e në disa të tjera 50 për qind. “E mira” e variantit anglez është se vaksina fatmirësisht ka një lloj mbrojtje për këtë mutacion. Vaksina Pfizer po mundohet që të bëjë një dozë të tretë për ata kanë bërë dy dozat e para, për shkak të mutacioneve të reja. Çdo lloj vaksine ul mundësinë që ti të ikësh në spital apo të vdesësh”, tha Troci.
