Përurimi i shtatores së Azem Hajdarit në Tropojë shërbeu edhe për një bashkim brenda Partisë Demokratike. Në ceremoninë e organizuar nga Bashkia e Tropojës ishin ftuar dhe morën pjesë edhe kritikët e Lulzim Bashës brenda PD, Besnik Mustafaj, Astrit Patozi, Ridvan Bode dhe Arben Imami. Por nuk kanë pasur takim me Bashën.
Përmes një postimi në “Facebook”, Patozi ka përshkruar rikthimin e tij në Tropojë për Azem Hajdarin.
“Në Tropojë kisha qenë për herë të fundit në verën e 1997-s. Ishte fushatë dhe mbaj mend që isha në autokolonë vetëm një makinë pas Azem Hajdarit. Ka qenë udhëtim i vështirë dhe plot tension, në sintoni me kohën e vështirë që kalonte Shqipëria. Pak më shumë se 20 vjet më vonë, sot e pashë sërish Azemin në qendër të Bajram Currit, të derdhur në bronz. Shumë ujëra kanë rrjedhur që atëherë, rruga është e qetë dhe pa të papritura, por jeta nuk është asnjëherë e lehtë dhe paqja nuk vjen vetëm atëherë kur nuk ka luftë”, shkruan Patozi.
Ish-deputeti demokrat bën edhe një ftesë për çdo njeri që ka guxim dhe beson te betejat që ka nisur.
“Nderimi i vërtetë për Azem Hajdarin shkon përtej asaj shtatoreje, e cila prej sot do të zbukurojë sheshin e vendlindjes së tij. Ai është në fakt një ftesë për kurajë dhe guxim për çdo njeri të lirë, që bën betejë për vlerat që beson”, përfundon Patozi.