Një çantë ngjyrë kafe e braktisur në zonën e Sheshit Skëndërbej ka alarmuar sot kalimtarët e rastit, të cilët kanë sinjalizuar Policinë e Tiranës.
Gazetari Erjon Skëndaj ka siguruar për “BalkanWeb” pamje nga vendi i ngjarjes, ku shihet edhe çanta e dyshimtë, e cila duket se brenda ka diçka. Ndonëse policia ka vendosur disa shiritë, për të krijuar një perimetër sigurie, qytetarë të rastit, por ka dhe nga ata kureshtarë, që ecin shumë afër çantës së dyshimtë.
Ndërkohë, në vendin e ngjarjes janë 4 punonjës të policisë si dhe dy makina patrulle, ndërkohë që pritet mbërritja e forcave xheniere. Këto të fundit do të bëjnë të mundur kontrollin e çantës.