Ish-anëtarja e PDIU, Melisa Biraçi, ka shpërthyer në kritika dhe akuza të forta në adresë kreut të Partisë për Drejtësi, Integrim dhe Unitet, Shpëtim Idrizi.
Ajo i ka kujtuar Idrizit se edhe pse është në opozitë, plot 300 individë të familjes së tij politike i ka, sipas saj, të punësuar në administratë.
“Shpëtim Idrizi i bashkoi koalicionit opozitar siglën e Partisë për Drejtësi, Integrim dhe Unitet pak ditë më parë, duke e rreshtuar veten e tij si politikan anti-Rama.
Por, përtej “opozitarizmit” të Idrizit, partia që ai drejton nuk duket edhe aq opozitare. Përkundrazi, Idrizi ka një ushtri të gjerë të punësuarish në administratën e drejtuar nga Partia Socialiste.
Rreth 300 persona, të cilët kanë marrë postet zyrtare vetëm falë siglës së PDIU, vijojnë të jenë në funksionet e tyre, të pashqetësuar në vendet e tyre të punës, megjithë piruetat e Shpëtim Idrizit”, deklaroi ajo.
Biraçi vijon më tej në reagimin e saj, duke e akuzuar Shpëtim Idrizin se po bën një lojë të dyfishtë, duke e mbajtur një dorë tek mazhoranca dhe një dorë tek opozita.
Në këtë kontekst, Biraçi theksoi se Idrizi komunikon me Ramën përmes të punësuarve të PDIU në administratë.
“Bashkë-partiakët e Shpëtim Idrizit vijojnë të kenë poste kyçe në administratën e nivelit të dytë, kryesisht në Drejtoritë Rajonale të Sigurimeve Shoqërore, në ato të Shëndetësisë, në zyrat e Punës, në administratën tatimore e doganore.
Këta partiakë të Idrizit vijojnë të shijojnë frytet e pushtetit, pavarësisht se “zyrtarisht” janë në opozitë. Kjo armatë duket se i shërben kryetarit të PDIU si një urë komunikimi me “armikun politik”, Edi Rama”.
Duke vijuar më tej në reagimin e saj, ish-anëtarja e PDIU, Melisa Biraçi zbuloi, madje akuzoi hapur Shpëtim Idrizin se edhe pse është në opozitë, ai sipas saj, është “peng” i Ramës.
Për të argumentuar tezën e saj, Biraçi hoqi një paralele mes “sherifit dhe kalit”, teksa theksoi se Idrizi është gati të bashkohet sërish me mazhorancën, nëse Rama i fishkëllen vetëm njëherë.
“Natyrisht, Edi Ramës nuk i hyjnë në punë aspak “300 spartanët” e Shpëtim Idrizit në administratë. Por, siç duket, ai ka zgjedhur që të tregohet “zemër-hapur” me opozitarët e PDIU-së.
Ndoshta, Edi Rama është i bindur që Shpëtim Idrizi nuk është opozitar. Me një “fishkëllimë” politike, Idrizi dhe PDIU e tij mund të kalojnë menjëherë gardhin e opozitës dhe të dalë në krah të kryeministrit.
Edi Rama e ka treguar se i pëlqen të luajë deri në tallje me këtë kategori politikanësh.
Ai e di që Shpëtim Idrizi tërhiqet nga era e pushtetit dhe, përsa kohë që Rama të ketë drejtimin e qeverisë, kreu i PDIU-së nuk mund të jetë opozitar i tij.
Shpëtim Idrizi do të jetë kundërshtar i Ramës, kur vetë Rama të kalojë në opozitë. Deri sa të vijë ai moment, Shpëtim Idrizi do të jetë “opozitari”, por me një “ushtri” pushtetarësh në administratën publike”, nënvizoi ish-anëtarja e PDIU, Melisa Biraçi.
