Qeveria do të ndalojë dhënien e koncesioneve në vitin 2022, pasi ka rrezik që pagesat e buxhetit të tejkalojnë kufirin 5 për qind të parashikuar në ligj.
Projektbuxheti i vitit 2019 shpjegon se me mbylljen e paketës “1 miliard euro investime”, pagesat nga buxheti pritet të shkojnë sa 4,6 për qind të totalit të të ardhurave.
Në relacionin e buxhetit thuhet se kësaj vlere mund t’i shtohen pagesat e paparashikuara në PPP-të ekzistuese dhe të reja për: rrugën Milot-Morinë (rreth 400-500 milionë lekë në vit), koncesionet në sektorin e shëndetësisë, koncesionin e aeroportit të Vlorës (4.5 milionë euro në vit për 7 vjet), koncesionin e ri të rrugës Kashar-Rrogozhinë.
Të gjitha këto pika të mësipërme, po sipas relacionit, riskojnë shkeljen e rregullit fiskal në 2022 e më tutje.
“Të mos lejohet asnjë propozim për partneritetet publike- private që ndikojnë drejtpërsëdrejti apo në mënyrë të tërthortë buxhetin e shtetit në periudhën 2020- 2030. PPP-të e reja të parashikuara me tarifa për përdoruesin, të minimizohet apo eliminohet risku i mosplotësimit të kërkesës në mënyrë që limiti ligjor prej 5 për qind të respektohet rigorozisht përgjatë gjithë kohës”, thuhet në relacionin e buxhetit.
BORXHI PUBLIK
Ministria e Financave parashikon që borxhi publik të vazhdojë në trajektoren rënëse edhe për vitin e ardhshëm.
Referuar draftit të projektbuxhetit në vitin 2019, borxhi publik pritet të arrijë 65,3 për qind të PBB-së në 2019, 62.8 për qind në 2020 dhe më tej në 59.9 për qind në vitin 2021.
Sipas relacionit, financimi i brendshëm dhe i huaj do të realizohen në përputhje me objektivat strategjikë për të ruajtur qëndrueshmërinë e raporteve ndërmjet kostove dhe risqeve dhe për të zhvilluar tregun e titujve shtetërorë.
Shërbimi i borxhit në vlerë nominale do të shoqërohet në rritje, por me ritme relativisht më të ngadalta, krahasuar me të ardhurat në buxhet dhe rritjen ekonomike të vendit.
“Normat e interesit në tregun e titujve shtetërorë pritet të jenë në nivele të ulëta, të paktën deri në fund të 6-mujorit të parë”, thuhet në projektbuxhet.
