Termi “burrneshë” përdoret shumë në vendet ballkanike, kryesisht në Shqipërinë e veriut, në Kosovë dhe në Malin e Zi dhe nënkupton vendimin e një gruaje për të jetuar si burrë e që shoqëria e njeh si të tillë.
Këtyre virgjëreshave të përbetuara, fotografja italiane Paola Favoino i ka dedikuar projektin “Je Burrneshe!”, një galeri me fotografi në qytetin e Torinos. Ky projekt përfshin një sërë fotografish dhe një dokumentar me metrazh të shkurtër, të realizuara prej vitit 2010 e deri tani. Pas shumë udhëtimesh në Shqipëri, Favoino ra në gjurmët e këtyre personave dhe takoi burrneshën e parë, Gjinin, që sot është 80 vjeç.
Në mediat italiane kjo ekspozitë ka marrë shumë jehonë dhe gazetat më prestigjioze kanë shkruar edhe mbi fenomenin. Ato thonë se motivet që detyrojnë gratë të zgjedhin këtë jetë janë të shumta, që nga mungesa e trashëgimtarëve meshkuj pas vdekjes së kryetarit të familjes, e deri te refuzimi i një propozimi për martesë apo prirjet lesbike që nuk mund të thuhen hapur. Sot vajzat shqiptare nuk kanë pse të zgjedhin më këtë jetë, por shumë burrnesha, tashmë të moshuara, janë ende gjallë për të treguar historinë e tyre.
Shihni galerinë e mëposhtme me disa nga personazhet./Tiranapost.al/
-
- Gjini nga Lezha. Foto e vitit 2011. Sot mbi 80 vjeç, është kthyer në burrneshë që në moshën 22 vjeçare pasi prishi fejesën. Sipas Kanunit, një premtim i pambajtur (besa) lahet me gjak.
-
- Fize, 56 vjeç. Foto e vitit 2013. Bëhet burrneshë në moshën 14 vjeçare pas vdekjes së vëllait.
-
- G., 48 vjeç. Foto e vitit 2013. Bëhet burrneshë në moshën 17 vjeçare pas vdekjes së të atit. Sot jeton me mamanë dhe familjen e Ilirit, vëllait të vogël që falë sakrificës së saj ka mundur të ndjekë studimet e larta.
-
- Marku, 50 vjeç nga Lezha. Foto e vitit 2011. Është më e vogla e motrave, por që e vogël ndihej burrneshë. Ka punuar si mekanik dhe ka humbur tre gishtërinj në kohën e diktaturës. Sot jeton me vetëm me macet dhe herë pas here viziton vëllain në Shtetet e Bashkuara.
