Ambasadorët e BE-së pritet të marrin sot në konsideratë kërkesën e Britanisë së Madhe për të shtyrë largimin nga BE përtej 31 tetorit, pasi kryeministri britanik, Boris Johnson propozoi zgjedhje të parakohshme në dhjetor.
Sipas diplomatëve në Bruksel, përfaqësuesit e 27 vendeve anëtare të BE-së u takuan të mërkurën, por nuk vendosën një shtyrje për Brexit-in. Megjithatë, ata ranë dakord për domosdoshmërinë e shtyrjes së afatit të Brexit-it, për të ndihmuar bllokimin në Londër.
Çështja kryesore për BE-në është sa kohë duhet të zgjasë shtyrja e afatit të Brexit-it.
Franca ka hedhur idenë e një shtyrjeje të afatshkurtër, ndërsa Gjermania është ndër vendet që janë pro shtyrjes tre mujore të kërkuar zyrtarisht nga qeveria britanike.
Një mundësi është ashtuquajtura “shtyrje elastike” (flextension), me anë të së cilës Londra do të largohej nga BE para 31 janarit në rast se marrëveshja e daljes do të ratifikohej nga deputetët britanikë dhe BE përpara kësaj kohe.
