Britania ka dy javë kohë për të rritur ofertën e saj në lidhje me pagesën që duhet të kryejë përpara daljes nga BE-ja. Ultimatumi është dhënë nga Presidenti i Këshillit Europian, Donald Tusk, i cili tha se mungesa e një oferte më të lartë, do ta detyrojë Brukselin të ndjekë rrugë të tjera për divorcin. BE i kërkon Britanisë 60 miliardë euro për finalizimin e procesit ‘Brexit’, teksa oferta e Londrës deri më tani, nuk e ka kaluar shifrën 20 mld euro.
Presidenti i Këshillit Europian, Donald Tusk, i ka dhënë dy javë kohë Londrës zyrtare për të rritur ofertën mbi të ashtëquajturën ‘fatura e daljes’, një pagesë që Britania duhet të kryejë përpara se të largohet nga Bashkimi Europian.
Palët duket se kanë ndasi të theksuara mbi këtë pjesë në një kohë kur shuma e kërkuar nga BE-ja është 60 miliardë euro dhe propozimi i qeverisë britanike është jo më shumë se 20 miliardë euro. Në deklaratën e tij, Tusk paralajmëroi se nëse nuk do të ketë një dakordësi brenda fillimit të muajit dhjetor, atëherë, BE do të ndjekë një rrugë tjetër për ‘divorcin’.
“Ja kam bërë të qartë Kryeminsitres Theresa May se progresi mbi këtë pikë duhet të ndodhë pa kaluar fillimi i muajit dhjetor. Nëse nuk do të ketë progres të dukshëm deri në këtë kohë, atëherë unë do të jetë i detyruar të propozoj një rrugë tjetër mbi këtë proces, gjë që do të ndodhë në mbledhjen e Këshillit Europian.”
Bashkimi Europian ka argumentuar se Britania duhet të paguajë shumën e konsiderueshme për shkak të planifikimeve buxhetore, pensioneve si dhe projekteve të tjera. Buxheti i bllokut hartohet mbi terma 7-vjeçar, gjë që arsyeton edhe barrën e madhe financiare që duhet të paguajë qeveria britanike. Sipas Presidnetit të Komisionit, Zhan Klod Junker, të refuzosh ketë pagesë, është njësoj si të porosisësh pije në një tavolinë me miqtë, dhe me pas të largohesh pa paguar. Duke parë ndasitë e mëdha në qasjet e palëve, ekspertët vijojnë të mbeten skeptic mbi gjetjen e një zgjidhjeje të qëndrueshme.
