Bashkimi Europian po përgatit dy plane në lidhje me Brexit, pas vendimit të Parlamentit britanik për të mos hedhur në votim marrëveshjen e arritur mes Unionit dhe Kryeministrit britanik Boris Johnson. Zyrtarët në Bruksel po punojnë për të ratifikuar marrëveshjen e divorcit me Britaninë e Madhe pasi parlamenti britanik nuk arriti të jap dritën jeshile për marrëveshjen.
Presidenti i Këshillit të BE-së, Donald Tusk, pas dy letrave të kryeministrit britanik, i cili në njërën kërkonte zgjatje të afatit, por e pa sigluar, dhe në tjetrën shpresonte që Brukseli të mos e merrte parasysh kërkesën e parë, kjo e dyta e firmosur, ka vendosur të nis konsultimet me përfaqësuesit e 27 vendeve të Unionit.
Por Johnson dëshiron të dalë nga Bashkimi deri në 31 tetor dhe për këtë po përgatitet për një javë tjetër debati të zjarrtë.
Ministri i Jashtëm, Dominic Raab, tha se ishte i sigurt se marrëveshja do të marrë dritën e gjelbër dhe se për këtë, ‘numrat’ janë. Por Parlamenti njëkohësisht duhet të miratojë legjislacionin që lidhet me zbatimin e marrëveshjes së Brexit, amendament ky i propozuar nga Oliver Letwin, i votuar nga Parlamenti britanik dhe që i hapi rrugën shtyrjes së afatit për Brexit.
Sidoqoftë, kancelari i planifikimit të Brexit dhe numri dy i qeverisë, Michael Gove, ka paralajmëruar se shanset që Britania të largohet nga BE pa një marrëveshje ende ekzistojnë dhe se edhe për këtë qeveria është ë përgatitur.
Ndërkohë, laburistët, shumica e tyre kundër marrëveshjes së Johnson, po përpiqen të ngrejnë një tjetër kurth. Ata do të paraqesin të tjera ndryshime ligjore dhe do të kërkojnëorganizimin e një referendumi të ri.
