Kryeministri Edi Rama i ka kushtuar sot një dalje të veçantë situatës së furnizimit me ujë ne Shqipëri. Kreu i qeverisë tha se aktualisht janë 128 kantierë pune në rrjetet e ujesjellësave. Rama tha se në qeverisjen e PD vetëm një qytet kishte 24 orë ujë, ndërsa tani, sipas tij, 23 zona urbane furnizohen non stop me ujë të pijshëm.
“Sot që flasim ka 23 zona urbane me 24 orë ujë në ditë, ndërkohë që kur qeveriste PD, vetëm një qytet kishte 24 orë ujë dhe ky qytet ishte Korça. Qeveria jonë ka trashëguar rrjete të degraduara ujësjellësash të ndërtuar që në vitet 60-70. Në Tiranë nga 7 orë furnizim në orë mesatarisht, sot Bovilla furnizon me 16 ore mesatarisht, edhe pse ka lagje me 24. Furnizimi mesatar më parë në gjithë territorin ishte 10 orë, sot që flasim jemi në 15 orë“, tha Rama
Kryeministri iu përgjigj edhe atyre që thonë se Shqipëria është mbrapa, pasi flet ende për ujë. Sipas tij, faji vjen nga e kaluara
“Bota ka shkuar në Hënë me kohë, por në sistemin tonë të ujësjellësve, kemi një pasqyrë shumë të posaçme në raport me botën por jo me rajonin.Rrjetet e trashëguara janë të trashëguara që në vitit ’60 dhe janë të amortizuara”, tha Rama.
