Ideja e shkëmbimit të territoreve me Kosovën nuk mund të jetë legjitime dhe nuk është e pranueshme të flitet për të.
Kështu ka theksuar ministri i Administratës dhe Vetëqeverisjes Lokale në Serbi, Branko Ruzhiq.
Ruzhiq mendon se epilogu i dialogut varet nga qeverisja në Serbi mirëpo një ide e tillë nuk mund të jetë e realizueshme, përcjell lajmi.net.
“Unë mendoj se jemi duke shkuar në drejtimin e duhur dhe se shteti serb do të arrijë një zgjidhje racionale dhe të kënaqshme para së gjithash për popullin serb”.
Ai ka shtuar se përfundimi i çështjes së Kosovës është me rëndësi jetike për Serbinë dhe duhet pasur kujdes.
“Vullnet mund të ketë në të gjitha anët, në Bruksel, Uashington, Moskë, Pekin edhe në Beograd sigurisht por e rëndësishme është të ketë në Prishtinë”, ka thënë Ruzhiq.
Ministri serb është shprehur se referendumi është një nga instrumentet më të mira për të arritur një qëndrim të qartë të qytetarëve, por sipas tij është ende herët për të folur rreth datave.
