Bien shtrimet ditore në Infektiv. Në 24 orët e fundit në spitalin Covid 1 janë kryer rreth 15 shtrime, 5 raste më pak se mesatarja ditore në dy javët e fundit. Burime të sigurta brenda spitalit Covid 1 thonë se të gjitha urgjencat e mbërritura në 24 orë janë me moshë mbi 65 vjeç, që është edhe mosha dominante në mbi 95% të pacientëve të shtruar në spitalin covid 1 dhe covid 3.
Aktualisht dy spitalet numërojnë rreth 120 pacientë që zënë 45% të kapacitetit spitalorë për të sëmurët në gjendje të rëndë me Covid 19. Nuk ka ende asnjë sinjal zyrtar nga Ministria e Shëndetësisë se kur do të nisë rikonstruksioni i godinës së vjetër të Infektivit që ishte përcaktuar në fillim të muajit janar 2022, vendimmarrje surprizë e ministrisë së linjës që për të përmbushur qëllimin ka mbyllur që prej datës 30 dhjetor urgjencën kirurgjikale më të madhe në vend për t’i kaluar ambientet e saj në funksion të urgjencave covid!
Burime nga ky spital thonë se ka nisur gradualisht transferimi i pacientëve nga Covid 1 drejt Covid 3 që do të përfundojë brenda datës 20 shkurt. Nga ana tjetër infektimet nga Omicron po dëshmojnë një rënie të ndjeshme. Shifrat që jep ministria bazuar në numrin e pakët të testimeve ditore tregojnë se në të gjithë vendin janë ende aktiv me Sars Cov 2 rreth 10 mijë persona, ndërsa incidenca 2-javore është përgjysmuar në 460 infektime për 100 mijë banorë nga 982 që numëroheshin në periudhën 14-21 janar 2022, që shënjon dhe pikun e valës së shkaktuar nga varianti Omicron.
Ekspertët epidemiolog janë shumë optimist se reduktimi i infektimeve ditore do të çoj në ulje të ndjeshme te shtretërve spitalor si dhe fataliteve për pjesën e mbetur të muajit shkurt, ndërsa fillimi i muajit mars sipas ekspertëve pritet ta nxjerrë Shqipërinë nga faza akute e pandemisë dhe kalimin drejt një forme shumë më të butë virale që në gjuhën shkencore konsiderohet endemi, e krahasueshme për nga klinikat dhe format e rënda me gripin sezonal.
