“Berati është bërë shumë i bukur”. Kjo është fraza që dëgjon prej të gjithëve që e kanë vizituar qyetin në këto ditë festash të dhjetorit. Qyteti muze i vendit po përjeton magjinë e shtuar falë dritave të shtumta që i kanë dhënë ndriçimin e munguar e gjithë këtyre viteve.
Me një organizim që do e kishte zili çdo qytet tjetër në Shqipëri, Berati po kthehet në destinacionin, tashmë jo vetëm të turistëve të huaj, të cilët sa vijnë e rriten në numër, por edhe të atyre vendas që po e shohin qytetin e një-mbi-një dritareve si fundjavën perfekte qetësuese, tashmë nën dritat e krishtlindjeve dhe Vitit të Ri.
Atmosfera vihet re kudo, si tek hotelet të cilat janë tashmë të mbushur me turistë, ashtu edhe tek vetë qytetarët e Beratit që kishin vite pa buzëqeshjen e qytetit të tyre, i cili ndër vite nuk tregonte më jetë.
Qendra e qytetit në veçanti ka marrë një pamje spektakolare. Ndërhyrjet në lumin Osum me zgjerimin e shtratit dhe sistemimin e tij dhe dekorin e dritave në dy urat ofrojnë një pamje mahnitëse për çdo të apasionuar pas fotografisë. Po ashtu edhe pedonalja e famshme e qytetit tashmë nuk shkretohet që ne orët e para të pasdites, por gumëzhim deri në orët e vona të mbrëmjes me muzikë dhe drita.
Me një punë të thjeshtë me kosto minimale, Bashkia e Beratit ka mundur të krijojë çdo pjesë të dekorit nëpërmjet ndërmarrjeve të veta, duke e kthyer qendrën e qytetit në një hapësirë gëzimi për fëmijët në radhë të parë me organizimin e aktiviteteve të ndryshme ku ata janë protagonistë. Ideja dhe vizioni i bashkisë për t’i shtuar magjisë së Beratit dhe magjinë e festave ka gjetur përkrahjen e sipërmarrësve lokalë, institucioneve financiare, korporatave, fondacioneve dhe shoqatave si AADF apo BID.
Berati i sotëm është shembulli se si brenda 1 viti, një qytet ndëron dy epoka. Pas shumë viteve i lënë në dorë të dytë dhe i lënë jashtë vëmendjes, tashmë Shqipëria ka fituar një qytet tjetër në kartolinën e saj, beratasit kanë fituar qytetin e tyre dhe shqiptarët kanë fituar një tjetër destinacion për të vizituar.