Rozeta Dobi përdori çelësin që i kishin dhënë pronarët për t’u futur brenda banesës ku punonte, së bashku me djalin dhe për të grabitur një shumë prej 120 mijë eurosh.
Nënë e bir kanë inskenuar sikur banesa është grabitur nga persona të tjerë, duke bërë shtëpinë rrëmujë para se të largoheshin për të humbur gjurmët, raporton News 24.
Ngjarja ka ndodhur më datën 15 dhjetor dhe në shtëpinë ku punonte 49-vjeçarja si pastruese jetonte një grua dhe vajza e saj.
Pastruesja dhe djali i saj 23-vjeçar u zbuluan pas një hetimi nga policia. Nga 120 mijë euro që ishte shuma e grabitur dhe sendeve me vlerë të vjedhura, nënë e bir iu janë sekuestruar 80 mln lekë të vjetra pasi pjesa tjetër ishte shpenzuar për 2 automjete.
Sipas burimeve, mësohet se paratë janë marrë në 15 dhjetor, ashtu si sendet me vlerë, ndër to bizhuteri të shtrenjta, varëse, ora, çanta firme etj.
“Nga provat e siguruara në kuadër të këtij operacioni, rezultoi se gjatë periudhës që shtetasja R. D. ka qenë e punësuar për mirëmbajtjen e një banese në rrugën e Kosovarëve, kjo shtetase, në bashkëpunim me shtetasin H. D. (djali i saj), ka vjedhur në këtë banesë, shuma të konsiderueshme parash dhe sende me vlerë, të cilat arrijnë në vlerë totale, rreth 120 mijë euro.
Gjatë kontrollit të banesës së shtetasve të arrestuar, shërbimet e Policisë gjetën dhe sekuestruan në cilësinë e provës materiale, 58 150 euro, 7000 dollarë, 368 000 lekë të rinj, sende me vlerë (aksesorë floriri), 3 automjete, 2 prej tyre të blera nga paratë e vjedhura, si dhe veshje të përdorura gjatë kryerjes së kësaj veprimtarie”, njoftoi policia.
