Kryetari i PD: Taksa progresive ka dështuar, s’po hapen vende pune
Për herë të parë Lulzim Basha, ish-ministër i qeverisë së Sali Berishës sot kreu i PD, ka pranuar publikisht se dy prej privatizimeve më të rëndësishme si CEZ dhe ARMO, ndërmarrë nga qeveria e djathtë kur ishte në pushtet, rezultuan të dështuara. Deklarata e Bashës u bë gjatë konferencës për “(De) Rregullimi i Tregjeve”.
“Është vërtetë, privatizimi i ARMO-s dhe privatizimi i CEZ-it nuk dhanë rezultatet e pritura. Me qëllimin për të arritur një rezultat me të mirë publike që ishte në gjenezë privatizimi i ARMO dhe CEZ, të dyja te dështuara, absolutisht dhe qëllimit për të kapur çdo sektor të ekonomisë me duart e politikë dhe të një grushti njerëzish të lidhur me politikën”, u shpreh Basha.
Kryetari i opozitës akuzoi qeverinë se, ka shkatërruar ekonominë, duke promovuar aktivitetin kriminal të drogës. Ky model, tha Basha, zbras Shqipërinë dhe largon invetimet e huaja në vendet fqinje. “Cili është modeli sot? Droga 180 mln euro në një kontenier banahesh. Çfarë sjell kjo? Shkatërron biznesin”, tha Basha.
Gjatë kësaj konference kryetari i opozitës, Lulzim Basha ka ngritur shqetësimin e papunësisë dhe familjeve të varfa, të cilave u është hequr përkrahja sociale.
