Huaja bankare për ekonominë në periudhën nëntor 2017-nëntor 2018 ka shënuar rënie me 3.5%, teksa stoku ka zbritur nga 554 miliardë lekë, në 534.8 miliardë lekë, njoftoi dje Banka e Shqipërisë. Efektin më të madh në këtë tkurrje e ka dhënë kredia në valutë për bizneset, që është tkurrur me 5.3% me bazë vjetore, ku efekt ka dhënë dhe zhvlerësimi i euros. Por, në rënie është dhe huaja në lekë për bizneset, që është reduktuar me gati 4% me bazë vjetore. Ndërkohë, kredia për individët në lekë ka përjetuar një zgjerim prej gati 10 përqindësh.
Megjithatë, stoku i kredisë në total shënoi rritje prej 2.3 miliardë lekësh (0.4%) në krahasim me tetorin. Rritja në nëntor ka ardhur si rrjedhojë e shtimit të huasë në lekë për korporatat, që është zgjeruar me 0.9% në raport me muajin e mëparshëm ndërsa ajo në valutë ka rezultuar me rënie. Ecuri pozitive ka shënuar dhe kredia për individë, sërish në lekë, që është rritur me 0.5% me bazë mujore.
Nga ana tjetër, depozitat bankare në fund të muajit nëntor arritën në 979 miliardë lekë, sipas statistikave të BSH. Në krahasim me tetorin, depozitat ranë me 4 miliardë lekë, ose 0.4%, si rrjedhojë e rënies së kursimeve të bizneseve dhe individëve si në lekë ashtu dhe në valutë. Ky është muaji i dytë që depozitat shënojnë rënie, pasi ato ishin rimëkëmbur lehtë në periudhën e verës, të ndikuara kryesisht nga valuta që sjellin emigrantët në sezonin e pushimeve.
