Detaje të reja kanë dalë nga operacioni në ish-Bllok, ku u arrestua pronari i një lokali mjaft të njohur në zonë, pasi ishte kthyer në ambient përdorimi kokaine për klientët.
Sipas hetimeve të kryera nga policia dhe prokuroria, skemën e drejtonte pronari i lokalit ‘de Charme’, por për të mos rënë në sy, kontaktet me klientët ja linte në dorë kamerierëve dhe banakierëve që punonin në clubin e natës. Sipas “Shqiptarja.com” mëson ekskluzivisht, se pronari i arrestuar është Orial Peçi, 38 vjeç. Peçi, pronar i ‘de Charme’ ka 100 % të aksioneve në shoqërinë “ITALBA BUSINESS” krijuar në 24 mars 2017
Bashkë me të, në pranga ranë edhe tre persona të tjerë: Administratori i lokalit, Arbër Alkurtaj 22 vjeç, kamerieri Albi Llangozi dhe një klient të cilët ju gjet një thikë dhe 6 fishekë. Në gjendje të lirë po hetohen edhe tre persona të tjerë për prodhim dhe shitje të narkotikëve dhe për mbajtjen pa leje të armëve shpërthyese dhe i municionit. Veç të arrestuarve, në këtë operacion të koduar “Blloku”, u shoqëruan edhe mjaft persona të pranishëm në lokal, mes të cilëve ishte edhe Dj i njohur, Vin Veli. Ai u lirua pasi dha dëshminë në Policinë e Tiranës për sqarimin e rrethanave të ngjarjes.
Specialistët e Seksionit për Hetimin e Narkotikëve kishin marrë informacion se pronari i lokalit ‘de Charme’ u shiste kokainë në doza të vogla klientëve të tij.
Gjatë kontrollit të ushtuar, dy klientëve u është gjetur nga një dozë me kokainë. “Po gjatë kontrollit në brendësi të lokalit, në pjesën e fundit të banakut, në një ambient të veçuar, me hyrje nëpërmjet banakut janë konstatuar mbetje lëndë pluhur e bardhë e dyshuar Kokainë, e sende të tjera që shërbejnë për mbajtjen dhe përdorimin e lëndës narkotike”, thotë Policia e Tiranës. /Shqiptarja.com
/AlpeNews.al
