Kryetari i Partisë “Balli Kombëtar Demokrat” Artur Roshi një ditë pas protestës së opozitës ngre pyetjen nëse ka moral kjo opozitë. Ai thotë se e djathta tradicionale si “klasë e përmbysur” nuk e dëgjoi zërin që e përfaqësonte.
“A ka moral opozita të deformojë përfaqësimin e të djathtës konservatore tradicionale me njerëz që nuk kanë lidhje me të? Morali mund të mos hyjë në punë për të ardhur në pushtet sepse keq qeverisja po ndihmon për të ardhur në pushtet, por morali të krijon besim strukturor sot dhe qeverisje të qëndrueshme nesër.”
Këto janë fjalët që ka shkruar Artur Roshi një ditë pas protestës. POR çfarë ndodhi? Vetëm një ditë para protestës Kreu i “Ballit Kombëtar Demokrat”, shumë entuziast shkruante se do të ngrihej të protestonte për bindje morale përkrah opozitës që sot i shtron pyetjen “A ka moral?”. Nuk e dimë çfarë e mërziti Artur Roshin. Nuk i gjeti bindjet morale në protestën e djeshme të opozitës apo kishte ndonjë hatërmbetje që nuk i dhanë fjalën të fliste, si të gjithë kryetarëve të tjerë të partive të vogla aleate në miting? Kujtojmë se në protestë veç kryetarëve të Partisë Demokratike e Lëvizjes Socialiste për Integrimn, folën edhe Vangjel Dule, Agron Duka, Dashamir Shehi, Fatmir Mediu, dhe Nard Ndoka.
Çfarë shkruante Artur Roshi një ditë para protestës?
Ne dalim në protestë PER MORAL
“Bindjet morale janë në themel të qënies sonë politike,sistemi ynë i referimit. Bindja morale bazohet tek arsyetimi. Ato janë karakteristike apo cilësi fisnike e familjeve tona. Të tjerët kanë besime, dogma e ideologji. Ne dalim në protestë për bindjet morale të tjerët dalin për besime, dogma dhe ideologji. Ky është ndryshimi thelbësor.
Lind pyetja çfarë na bashkon ne me ata ? Qeveria po na çon përtej varferisë dhe në stacionin e mjerimit.Kjo gjë ka të bëjë me humbjen e identitetit të qenies njerëzore sepse do të thotë se ne jemi të paaftë të mendojmë për të jetuar,dhe si të tillë nuk jemi qenie njerëzore. Tek identiteti njerëzor qëndron heshtas pasioni. Ajo që na bashkon të gjithë është pasioni për të jetuar.Ky pasion nuk njeh kufi binjesh,besimesh,doktrinash,dogmash e ideologjish.
Kjo është protesta e dt.27 Janar. Zgjedhjet janë procesi që diferencon mendimet për një qëllim tjetër zgjidhjen e të ardhmes përtej mbijetesës. Këtu ndahemi dhe Partia Demokratike duhet të ndajë bashkpunimin që përcakton vetë ajo para zgjedhjeve me bashkpunimin që përcaktojnë qytetarët mbas zgjedhjeve. Por deri athere duhet të respektojmë pasionin për të jetuar,protestat kundër qeverisë që na mohon një gjë të tillë.”
Çfarë shkruan Roshi një ditë pas protestës?
A ka MORAL OPOZITA jonë?
“Me të djathtët por pa zërin e të djathtëve
Dje Opozita protestoi.
Protestuesit që morën pjesë përfaqësonin grupe të interesave politike nga qendra e majtë deri tek e djathta tradicionale si vazhduese e ideve të Mid’hat Frashërit apo thënë ndryshe e djathta konservatore moderne europiane. Zërat e oratorëve politikë nga foltorja e protestës iu adresuan segmentit politik nga qendra e majtë deri tek qendra e djathtë.
E djathta tradicionale si “klasë e përmbysur” nuk e dëgjoi zërin që e përfaqësonte. A ka moral Opozita të deformojë përfaqësimin e të djathtës konservatore tradicionale me njerëz që nuk kanë lidhje me të ? (Sot në protestë nesër në qeveri) A është njëlloj me deformimin e vullnetit të qytetarëve që Qeveria bëri në zgjedhje të 25 Qershorit 2017 me blerjen e votave ? Meqënse është njëlloj,atëherë ku është ndryshimi që kërkojnë shqiptarët ?
Tek fotografitë e politikanëve apo tek morali i tyre ?
Kjo do të thotë se Opozita predikon e impostuar si e djathtë,por realisht ka mëndësi të majtë. Ne duhet të krijojmë një qeverisje si zgjatim i Ramës apo të kundërtën e tij ? Morali mund të mos hyjë në punë për të ardhur në pushtet sepse keq qeverisja po ndihmon për të ardhur në pushtet,por morali të krijon besim strukturor sot dhe qeverisje të qëndrueshme nesër. Metodat Makiaveliste afër qëllimit me çdo mjet dhe larg parimeve ,krijojnë pushtete të paqëndrueshme dhe të frikshme,prandaj në vendet e zhvilluara nuk i lakmojnë. Partia jonë është themeluar nga Mid’hat Frashëri në Regio Emila të Italisë në 1945 si e para parti demokratike në historinë politike të vendit tonë.
Si e tillë është një parti e vjetër,por jo e vjetëruar në ide dhe e pakonsumuar nga korrupsioni,nuk vuan nga mungesa e moralit,nga mosmbajtja e premtimeve ndaj qytetarit,nga abuziviteti me pushtetin,etj. Protestuesit i përshëndeti edhe një socialist me logjikën se edhe socialistët janë kundër Ramës. Po Rama që ka në qeverisje edhe drejtorë që kanë qenë kandidat për deputetë të PD,mund të thotë se qeveris bashkë me PD dhe demokratët janë pro tij? Ky socialisti që nuk jep as votën e tij na vlen më shumë se një përfaqësues i të djathtës tradicionale që ka (X )% vota. Thonë që “agait të ri” dhe “dhëndërit të ri” mos i thuaj gjë sepse nuk të dëgjon për shkak të emocionit që i sjell pushteti.
Shembulli është para syve.Rama gjatë katervjeçarit që shkoi ishte arrogant dhe shpërfillës ndaj çdo zëri logjik,por kjo gjë i prodhoi perceptimin se keq qeveris. Sot që e ka kuptuar këtë gjë është më i kujdesshëm ndaj çdokujt përfshirë dhe Opozitën.
Unë them se bindja ime morale ka në bazament arsyen dhe logjikën,që çdo votë duhet vlerësuar me mirënjohje dhe jo më një sasi e konsiderueshme që qëndrojnë të ndrojtura por me fuqi përcaktuese në frymën e së djathtës. Dikush mund të thotë se tregohem egoist. Po,por Egoizmi im,është i përputhur me ambicjen për të përfaqësuar interesat e njerëzve me kontribut të qenësishëm në themelet e demokracisë.
Egoizmi im është me bonsens,në kufijtë e ambicjes së një gare konkurentësh dhe e kërkon pushtetin për honor mbi meritë dhe moral. E kundërta ,heshtja është pazotësi dhe përulje që e kanë katakteristikë njerëzit që duan thjesht përfitime personale dhe jo gjëra që dalin jashtë nga interesi i tyre meskin.
Sinqerisht ndjehem i çuditur nga emocioni i pushtetit,jashtë pushtetit që ka përfshirë njerëzit afër zotit Basha.”
Këto janë dy qëndrimet e ballistëve me gojën e kreut të tyre Artur Roshi brenda 24 orësh. Para protestës entuziazëm dhe MORAL. Pas protestës sharje dhe aspak MORAL. Pas kësaj gjykoni vetë, për të kuptuar se përse nuk i voton më askush.
Përgatiti:AlpeNews.al
