Historia e Babales, ka një tangente që e bashkon me 21 janarin apo me Azem Hajdarin.
Në të tre këto raste, Partia Demokratike i ka ofruar protagonistëve para, për të mbyllur gojën ose në rastin Babale, për të krijuar një skandal.
Ditën e djeshme, regjistrimet e Prokurorisë treguan se PD, përmes deputetit Salianji, i kishte ofruar Babales dhe Alizotit nga 100 mijë euro për kokë, për të aktruar, i pari rolin e një trafikanti të penduar dhe i dyti rolin e vëllait të Ministrit të Brendshëm.
Ndonëse këto para nuk janë likujduar ende, të paktën sipas provave të Prokurorisë, shuma e majme bindi secilin nga dy protagonistët e përfshirë që të kryente me përpikmëri rolin, duke sajuar një skandal përmes të cilit PD tentoi të destabilizonte qeverinë, pikërisht në momentin kur Bashkimi Europian duhet të vendoste për hapjen e mundshme të negociatave të anëtarësimit.
Një situatë e ngjashme u verifikua edhe disa vite më parë, menjëherë pas ngjarjeve të 21 janarit, kur Kryeministri Berisha, dërgoi truprojën e tij Fatos Skeja tek familja e viktimës Hekuran Deda, duke i ofruar atyre të holla në këmbim të heshtjes.
Kjo ofertë u refuzua publikisht nga vëllai i të ndjerit, që më pas tregoi hollësisht për këtë tentativë blerje në media.
“Pas tre ditësh ka ardhë në 12 të natës, na tha e dinte kush e ka vrarë Hekuranin. E njihte vëllain tim. Na thanë pranojë Salinë të vijë nesër. Ne do ta gjejmë njeriun që e ka vrarë Hekurani. i thashë nuk dua ndihmë lekësh.
Mori një shok në telefon, më tha do vij me filanin të pijmë kafe. Kur erdhën këtu, gjatë muhabetit më tha. Kemi ndenjë gati dy orë këtu. Ai kishte ardhur me urdhër, jo se është nga zona jonë, se nga zona do vinte ditën, jo natën. Ai erdhi natën që të mos shihte asnjë.
Tha unë kam ardhë që të pranoni Sali Berishën të pijë kafe këtu se unë do ju ndihmoj nga gjendja ekonomike, do u gjej vrasësin”, dëshmia e atëhershme publike e vëllait të Hekuranit.
Me para u tentua të blihej edhe heshtja e Haklajt, pas vrasjes së Azem Hajdarit, siç tregojnë disa regjistrime sekrete të publikuara në media disa kohë më parë.
Protagonist i kësaj ngjarje ishte Jaho Salihi, i cili në një aplikim drejtuar Strasburgut, pas ekzekutimit të Hajdarit, pranon se ishte takuar me Fatmir Haklajn, i cili i pati thënë se Berisha i kishte ofruar me miliona dollarë, për të mos rrëfente përfshirjen e tij në vrasje.
Pak kohë më pas, Haklaj dhe të afërmit e tij u ekzekutuan në Kërnajë, duke fshirë çdo gjurmë të ketij premtimi.
Me para, premtime për azil apo favore të tjera janë tentuar të mbyllen edhe një numër aferash të tjera. Rasti i Zaganit është vetëm njëri prej tyre.
Megjithatë, të gjithë këto raste dëshmojnë se PD vazhdon t’i qëndrojë besnike traditës së saj, duke tentuar të blejë heshtjen apo duke paguar që të sajojë skandale, nga të cilët ajo ka një përfitim politik.
