Ishin përmbytjet masive që përfshinë Fierin dhe gjithë Shqipërinë në fillim të muajit dhjetor, që i morën jetën elektriçistit Sabri Vlinga, ndërsa ishte në krye të detyrës.
OSHEE ka marrë përgjegjësinë për të ndihmuar familjen e Sabriut të ndjerë, duke punuar për t’i dhënë një pension familjar dhe vetëm së fundmi ka punësuar të birin e tij, Xhelal Vlingën, 19-vjeç, që do të vazhdojë rrugën e babait.
Drejtori i OSHEE, Armand Xhuka, i ka dorëzuar Xhelalit një uniformë të vendit të punës dhe i ka uruar punë të mbarë, duke mbajtur premtimin për punësimin e tij pas humbjes së të atit. “Kishe një baba të palodhur dhe të kudondodhur, bëhu si ai”, tha Xhuka.
Xhelali ka mbaruar shkollën e mesme, mekanike, me profil të specializuar njësoj si i ati dhe tani do të marrë përsipër detyrat e kryefamiljarit, në mungesën e të atit.
