Organi që përfaqëson pakicën shqiptare të Serbisë mohoi të ketë kërkuar përfshirjen e autobiografisë së Hillari Klintonit në kurrikulën mësimore të nxënësve shqiptarë pasi ministri serb shprehu zemërim mbi rolin e Bill Klintonit në bombardimin e Jugosllavisë.
Nga Filip Rudic, BIRN
Këshilli Kombëtar Shqiptar tha të mërkurën se nuk i kërkoi ministrisë serbe të arsimit të jepte si lexim të detyrueshëm për nxënësit shqiptarë të shkollave të mesme autobiografinë e ish-senatores amerikane dhe kandidates presidenciale Hillari Klinton, pasi kërkesa e raportuar shkaktoi zemërim mes zyrtarëve në Beograd.
“Nuk e kemi kërkuar këtë. Ne besojmë se autobiografitë nuk mund të jenë lexime shkollore,” tha për BIRN sekretari i Këshillit Kombëtar Shqiptar Enver Mehmeti.
Mehmeti tha se Këshilli propozoi vetëm se cilat tekste shkollore në gjuhën shqipe duhet të përdoren në shkolla, të gjitha në përputhje me kurrikulën mësimore të miratuar nga Serbia.
Ministri serb i arsimit Mladen Sarceviç tha për gazetën e përditshme Politika të mërkurën se ai “nuk do t’i lejojë shkollat e mesme të japin mësim për dikë nga familja që urdhëroi bombardimin e Serbisë”, duke iu referuar fushatës ajrore të NATO-s të vitit 1999 që synoi t’i jepte fund operacioneve ushtarake të Beogradit në Kosovë, e cila u drejtua nga SHBA-ja nën presidencën e Bill Klintonit.
“Nëse shqiptarët e shohin familjen Klinton si një e mirë supreme, ne e shohim atë si të keqen supreme,” tha Sarceviç.
BIRN e pyeti Ministrinë e Arsimit se cili ishte propozimi i Këshillit Kombëtar Shqiptar dhe pikëpamja zyrtare e ministrisë për të, por nuk mori asnjë përgjigje deri në kohën e publikimit.
Përfaqësuesi i Këshillit Kombëtar Shqiptar, Chenan Hemeti, tha se autobiografia e Klintonit kishte për qëllim vetëm të shërbente si një shembull teksti shkollor i zhanrit të tij letrar dhe jo të bëhej lexim i detyrueshëm për nxënësit.
“Kjo nuk është një çështje shumë e rëndësishme dhe do të përjashtohet,” tha Hemeti për agjencinë serbe të lajmeve Tanjug.
Për shumë vite, shqiptarët etnikë që jetojnë në komunat jugore serbe të Preshevës, Bujanocit dhe Medvegjës kanë pasur probleme me marrjen e teksteve shkollore në gjuhën e tyre amtare nga Serbia.
Autoritetet serbe druhen se tekstet shkollore në gjuhën shqipe mund të përmbajnë ide politike që Serbia nuk i pranon, siç është pavarësia e ish-krahinës së saj të Kosovës, e cila u shkëput pas luftës në vitin 1999 dhe shpalli pavarësinë në vitin 2008.
