Kryeministri Edi Rama shprehet i vendosur të mos e largojë ministrin e Brendshëm, Fatmir Xhafaj .
Në një intervistë dhënë për gazetaren e Mirela Milori në Gjirokastër, Rama tha se ministri nuk mban përgjegjësi morale për vëllain e tij.
“Shkarkim për arsye morale? Jetojmë në një sistem ku nga mosha 18 vjeç, “secili berr varet nga këmbët e veta” dhe askush nuk mund të implikohet një vëlla se ka një vëlla.
Në pozicionin e kryeministrit nuk mund të bëj vlerësime bazuar në pretendime. Unë vendimet i marrë në bazë të fakteve.
Kur kam bërë zgjedhjen e Xhafës si ministër të Brendshëm unë e kam ditur këtë fakt.
Akuza ka pasur që në vitin 2002.
Kam kërkuar me urgjencë nga një agjenci e specializuar të di të vërtetën e audiopërgjimit.
Nëse do të kishte të dhëna për këtë që “një vëlla është aktiv në këtë aktivitet” e bën të pamundur që vëllai të jetë ministër”, tha Rama.
Lidhur me video-përgjimin, Rama tha:
“Eshtë e kotë të insistoj në këtë, sepse në fund të fundit, kjo është fjala e një pale dhe çfarëdo detaji të jap unë, nuk përbën argument për atë që ka dyshime.
Në Vlorë dëshmitari X njihet si një personazh kaq i marrë fund në rrugët e qytetit të kthehet në një hero mediatik.
Ka njerëz që e dinë që është farsë, komuniteti në Vlorë e njeh dëshmitarin X dhe janë të skandalizuar si mund të kthehet ky personazh në hero të opozitës, ndërkohë që ka edhe të tjerë që kanë dyshime dhe atyre unë iu them që fjala ime vlen aq sa vlen.
Le të presim përfundimin. Çështja do zbardhet. Faji nuk do mbetet jetim” u shpreh Rama.
