Agim Ismaili, drejtor i Përgjithshëm i Burgjeve, i cili është marrë në mbrojtje pas një telefonate kërcënuese, ka kujtuar sot mikun e tij dhe Dëshmorin e Atdheut, Ilir Ngresi. Komisar Ngresi është vrarë në një atentat të organizuar në vitin 2000.
Ismaili e kujton kolegun e tij si një njeri të vendosur dhe të paepur përballë krimit.
“Vitet ikin, por je e do jesh gjithmone mes nesh, ashtu i vendosur dhe i paepur përballë krimit dhe mik i mirë e i sigurtë në krah”, shkruan Ismaili.
Ilir Ngresi njihet si komisari që hapi dosjet e tmerrshme të Beratit, me serinë e vrasjeve të ndodhura në fund të viteve ’90. Ai u vra në një atentat në qytetin e lindjes, Vlorë, nga Kastriot Jaupi dhe Dritan Zhuka.
Por përpara se të vritej, Ngresi i kishte shpëtuar një tjetër atentati nga Lulzim Caka, i njohur si “i forti i Beratit”.
“Nuk do ta harroj kur atë fytyrë (Lul Cakës)”, ishte shprehur Ngresi pas atentatit në qafën e Koshovicës, në shtator të 2000.
Por Ilir Ngresi nuk arriti të shihte arrestimin dhe dënimin e Lul Cakës edhe për atentatin që i bëri atij, duke qëndruar 16 vite pas hekurave. Caka u lirua nga qelia në korrik të këtij viti, katër muaj përpara afatit, dhe për këtë arsye është shpallur sërish në kërkim.
