Atentat me armë zjarri te Komuna e Parisit në Tiranë. Ngjarja ka ndodhur rreth orës 22:00 të mbrëmjes së sotme, ndërsa raportohet se një person ka mbetur i plagosur.
Ende nuk dihet identiteti i tij, por vetëm mosha, 36-vjeç. Ai është plagosur në këmbë.
36-vjeçari u transportua me shpejtësi në spitalin e Traumës dhe sipas burimeve të Report Tv ndodhet jashtë rrezikut për jetën.
Gazetari Arsen Rusta raporton se policia ka rrethuar vendin e ngjarjes për të mbledhur provat, ndërkohë që janë ngritur disa postblloqe për të arrestuar autorët, të cilët janë larguar me shpejtësi duke përfituar nga errësira.
Grupi hetimor pritet që të marrë në pyetje të plagosurin mbi konfliktet që mund të ketë pasur për të zbardhur ngjarjen.
Gjithashtu pritet që të sekuestrohen edhe kamerat e sigurisë së bizneseve pranë vendit të ngjarjes për të shkuar në gjurmët e autorëve.