Atentati me tritol që tronditi Vlorën tre ditë më parë është një ngjarje e paralajmëruar. Nëse rikthehesh pas në kohë tek disa ngjarje të tjera kriminale, zbulon fijet që lidhin 25-vjeçarin Ines Hajrudha me viktimat e atyre ngjarjeve. Lapsi.al mëson se në muajin korrik të këtij viti, Ines Hajrudhës iu vra në Lungomare kushëriri i tij. Është fjala për Renato Omerin, i cili u qëllua me pistoletë para një lokali teksa po lëvizte me biçikletë. 37-vjeçari mbeti i vdekur në vend. Autori i krimit u largua drejt Ujit të Ftohtë, i ndihmuar edhe nga persona të tjerë. Ngjarja nuk është zbardhur ende.
Dy vjet më parë në Durrës në një tjetër atentat mafioz mbetën të vrarë dy persona; Ervin Kodra dhe Endri Çaushaj. Ky i fundit ishte nga Vlora dhe sërish kushëriri i Ines Hajrudhës. Dëshmitarë të ngjarjes thanë se makina u qëllua në lëvizje me breshëri armësh. Shkaqet e atentatit mbetën të panjohura. Duket se edhe atentati i Vlorës me tritol ndaj Ines Hajrudhës ka lidhje me dy ngjarjet e mëparshme kriminale, ku mbetën të vrarë kushërinjtë e tij, Renato Omeri dhe Endri Caushaj.
Ndonëse hetimet nuk kanë përfunduar ende, dyshimet janë se kemi të bëjmë me të njëjtën dorë në të tre atentatet. Atentati me 300 gramë tritol e la të gjymtuar 25-vjeçarin Ines Hajrudha, ndonëse synimi ishte që ai të eleminohej fizikisht. I riu biznesmen dhe me precedentë të mëparshëm penalë, ka humbur të dy këmbët dhe ndodhet në një gjendje të rëndë shëndetësore. Deri më tani policia s’ka asnjë të arrestuar për atentatin mafioz. LAPSI.al
