Grupi hetimor i Policisë së Shkodrës dhe Policisë Kriminale po heton një rast të rëndë vrasjeje, ku dyshohet se autorët janë vrasës me pagesë nga Mali i Zi. Sipas burimeve, makinat e viktimave kanë hyrë në Shqipëri nga Mali i Zi në ditët e fundit dhe kanë kryer disa lëvizje në afërsi të zonës së Dobraçit.
Hetuesit kanë sekuestruar mbi 35 gëzhoja në vendngjarje, duke e bërë këtë një skenë delikate për hetim. Makina e djegur e autorëve nuk ka dhënë informacion të vlefshëm deri tani, pasi numri i shasisë është dëmtuar nga zjarri. Megjithatë, ajo është dërguar për ekspertim në shpresën se mund të zbulohet ndonjë detaj.
Pjesa tjetër e hetimit është përqendruar te kamerat e sigurisë, por janë hasur vështirësi të shumta. Në zonën e ngjarjes, disa kamera mungojnë, ndërsa ato që ekzistojnë shpesh nuk kanë server për ruajtjen e pamjeve. Disa kamera janë të koduara dhe janë marrë për t’u analizuar në laborator.
