Vrasja e Fatos Ferracakut, ka rikthyer vëmendjen në qytetin e Shkodrës ku për 6 muaj ka pasur plot 7 të vdekur dhe 2 të zhdukur.
Në emisionin “Repolitix”, të ftuar janë gazetari i gazetës Shqiptarja.com, Elton Qyno; gazetari investigativ Artan Hoxha dhe dy ish-drejtuesit e policisë Mit’hat Havari dhe Arben Hajdarmataj.
Në fjalën e tij, gazetari investigativ , Artan Hoxha ka deklaruar se e njëjta dorë që ka vrarë Arjan Ferracakun, ka vrarë edhe të afërmin e tij Fatosin ditën e sotme.
“I plagosuri është qëlluar teksa po mundohej që të ndalonte autorin që të vriste viktimën. Dje, i thashë edhe kryeministri që nuk janë zbuluar apo kapur autorët e krimeve në Shkodër. Ky lloj krimi, është vrasje me pagesë. Nuk është më për hakmarrje. Ra përshtypja që në Shkodër u zgjidh gjithçka kur u goditën “Bajrajt”. U qetësua situata në Maj, Kirasi dhe Dobraci paten një “armëpushim”. Pastaj ndodhi vrasja e Silvana dhe Boran Bërçamës. Se di pse policia nuk ka marrë pamjet nga kamerat e sigurisë në banesat e tyre. Ka kamera atje. Ngjarja që i vuri vulën në Shkodër, ishte ajo e Arjan Ferracakut. Ai nuk ishte i përfshirë fare. Prandaj reagoi edhe opinioni publik. Për mua e njëjta dorë që ka vrarë Arjanin ka vepruar edhe sot. Policia në Shkodër nuk godet dot.”
