Ndonëse vrasja e 41-vjeçarit Devi Kasmi ka ndodhur në një rrugicë të errët, ku nuk ka pasur lëvizje e për pasojë nuk është parë nga askush, momenti i largimit të atentatorëve është parë nga dhjetëra dëshmitarë.
Disa prej tyre, thonë se pak sekonda pasi janë dëgjuar të shtënat, një motor i madh, i shtrirë ka dalë me nxitim nga rrugica “Petro Cani”, në rrugën “Kongresi i Manastirit”. Kjo rrugë, që ndodhet mes Pediatrisë dhe Spitalit Nr.5, është mjaft e populluar, kryesisht në krahun e djathtë, ku ndodhen dhjetëra farmaci dhe lokale.
“Pas të shtënave pamë një motor të madh, të shtrirë që doli nga rrugica dhe mori drejtimin për lart, andej nga SHISH, drejt kryqëzimit të oxhakut. Ishin dy persona në motor. Të dy me skafandra. Armë e gjë nuk pamë, sepse ishte shpejt. Por me shumë mundësi ata ishin autorët se u larguan me shumë shpejtësi”, tregojnë disa dëshmitarë në vendin e ngjarjes.
Ndërkohë Policia ka sekuestruar edhe pamjet filmike të disa bizneseve private përballë rrugicës ku ndodhi ngjarja, por edhe përgjatë rrugës që kanë ndjekur atentatorët për t’u larguar.
