Një atentat mafioz tronditi vendin mbrëmë, ku në qytetin e Vlorës u ekzekutua me snajper 22-vjeçari Gëzim Sinomati teksa ishte në ballkonin e banesës në katin e tretë të një pallati në lagjen “Hajro Çakërri’.
I riu, sapo ishte kthyer nga Belgjika dhe kishte dalë të pinte cigare në ballkon kur dyshohet se u qëllua me snajper, një ekzekutim i tipit mafioz të cilit nuk i mbijetoi dot. Ndërkohë, sapo i riu është qëlluar me plumb në kokë, dritat në zonë janë fikur dhe qyteti ka qenë në errësirë.
Nuk dihet nëse kjo ishte planifikuar nga autorët apo ka qenë thjesht një rastësi, por ekzekutori ka përfituar nga errësira për t’u larguar pa lënë gjurmë. Deri më tani janë shoqëruar në polici 14 persona, të cilët janë marrë në pyetje për vrasjen. Autorët e kanë goditur me snajper nga shumë pranë, ndërsa dyshohet se goditja erdhi nga godinat e banimit shumë pranë shtëpisë së tij, pallate banimi disa katësh një i përfunduar prej kohësh dhe tjetri në ndërtim e sipër. Nga grupi hetimor mësohet se ndaj objektivit është qëlluar vetëm një herë, ndërsa plumbi e ka goditur në kokë, duke gjetur vdekjen e menjëhershme.
Gjithashtu vendi ynë vitet e fundit është tronditur edhe nga atentate të tjera mafioze me snajper, ku edhe sot nuk dihen autorët e krimit. Alpenews.al ju risjell edhe njëherë në vëmendje atentatet me snajper.
7 Janar 2020: Një ekzekutim mafioz me snajper ishte ai i biznesmenit Kastriot Reçi, në Rrëshen. Ai u qëllua me plumb në zemër kur po ecte në qendrën e qytetit. Autori ishte vendosur në katin e fundit të një pallati 9-katësh, ai kishte lënë edhe snajperin në vendngjarje pas aktit kriminal. Reçi i kishte shpëtuar edhe atentateve të tjera të bëra ndaj tij.
12 Qershor 2015: Një tjetër ekzekutim me snajper është edhe ajo e Xhabir Shegës (Vid Shega) pasi kishte kryer 12 vite burg për vrasjen e Indrit Bajrit në vitin 2001. Me shënjestrën që kishin marrë autorët nga Kalaja e Shkodrës, dy plumba me snajper në gjoks, i morën jetën Shegës, teksa ndodhej në oborrin e banesës. Shega dyshohet të ishte përfshirë edhe në një krim tjetër të ndodhur në vitin 1999 në një local në Shkodër ku u ekzekutuan pesë persona njëkohësisht. Prokuroria nuk arriti ta vërtetonte kurrë se kush e ekzekutoi Shegën me snajper.
9 mars 2000: Ilir Bardhi u ekzekutua me snajper brenda qelisë së tij në burgun 313 në Tiranë. Snajperi ishte vendosur në dritaren e një pallati pranë godinës së burgut, gati 200 metra larg në vijë ajrore. Bardhi ishte arrestuar si i dyshuar për një vrasje të dyfishtë.
Alpenews.al