Në Gjykatën e Krimeve të Rënda u dëgjuan përgjime telefonike të Prokurorisë në lidhje me grupin e drogës në Memaliaj, të kapur në vitin 2016, i cili ndihmohej edhe nga një zyrtar i Policisë.
Bëhet fjalë për grupin e Besim Zikës dhe ish-policin e Komisariatit të Tepelenës, Gani Abazi. Ky i fundit, sipas përgjimeve, kishte njohje me kultivuesit dhe kishte dalë garant që Policia nuk do t’i prekte.
Në sallën e gjyqit, ditën e djeshme, u dëgjuan përgjime të komunikimeve me telefon të datave 20 dhe 27 korrik 2016, si edhe të datave 2, 3 dhe 14 tetor 2016. Sipas Prokurorisë, këto prova vërtetojnë se bashkëbiseduesit e shtetasit Besim Zika, që përdorin emrat Muharrem, Festim, Fatos, Agush, Arlimli, Ladi, djali i tezes së Besos, Kadri Endri etj., janë përshirë në veprimtarinë kriminale të kultivimit të bimëve narkotike, në formën e grupit të strukturuar kriminal.
Ish-polici, në një bisedë, telefonon Besim Zikën, ku ky i fundit i ankohet për disa zyrtarë vendorë, që u bënin presion fshatarëve që kultivonin drogën për llogari të tij. Ai i tregon policit se i paguante këta zyrtarë që të mos kallë- zonin plantacionet e kanabisit. Ndërsa në një nga bisedat dëgjohet një person, i cili e identifikon veten si “kushëriri nga deti”, ku i fundit e paralajmëron Besim Zikën që të pastronte magazinën dhe çdo gjë që kishte aty, pasi do të vinte Policia për kontroll.
Kujtojmë se ky rast u zbulua nga Prokuroria rastësisht, teksa hetonte vrasjen e Elton Çiçës dhe dhunimin e prindërve të tij në Tepelenë. Pas dëgjimit të përgjimeve, avokati i ish-policit, Andi Duraj, kërkoi që i pandehuri të merrej në pyetje, së bashku me Besim Zikën.
Më herët, ish-polici Abazi kishte kërkuar që të thirrej si dëshmitar ish-shefi i Rendit në Vlorë, Haki Hasanbegu, i cili qe arrestuar më parë si pjesë e grupit, por u lirua nga Krimet e Rënda.
Hetimet për vrasjen e Çiçës zbuluan ish-policin
Lidhja e ish-policit Abazi me trafikantët në Tepelenë u zbulua rastësisht nga Prokuroria. Ajo ishte duke hetuar për disa ngjarje kriminale, të cilat e kanë zanafillën në ngjarjen e ndodhur në Tepelenë, në prill 2015, ku janë dhunuar prindërit e shtetasit Elton Çiça, të dyshuar për këtë ngjarje kanë qenë shtetasit Ervis Imeri dhe Robert Rama dhe se ky i fundit është gjendur i vrarë në periferi të qytetit të Durrësit.
Më pas, u vra edhe shtetasi Elton Çiça. Duke hetuar për këto ngjarje të njëpasnjëshme kriminale, për të cilat janë përdorur edhe përgjimet telefonike, Prokuroria e Rrethit Gjyqësor Tiranë ka ardhur në dijeni të veprimtarisë së organizuar kriminale në fushën e kultivimit të narkotikëve në disa fshatra të rrethit Tepelenë, për të cilën autorët dyshohej se kishin mbështetjen e bashkëpunonin edhe me punonjës policie.
BISEDAT
Telefonuesi1: Alo, ej merre urgjent Ganiun në telefon, se më tha që s’po i hap telefonin
Besim Zika: Kë Gani, atë policin?
Telefonuesi1: Po ore, kë tjetër, atë policin.
* * *
Besim Zika: O Gani jam Beso.
Gani Abazi: Ke ndërruar numër ti, nuk më përgjigjeshe.
Besim Zika: Jo more, këtë numër kam 1 vit, që e kam. E ndryshova atëherë.
Gani Abazi: S’e dija, po ç’bën, si je ti?
Besim Zika: Mirë, ja po vij andej.
Gani Abazi: Po pse na hap kështu problemesh?
Besim Zika: Nuk i hap unë këto probleme, i hap Hazizi. Ai çuni i komunës.
Gani Abazi: Për këtë doja të pyesja unë, atë e paguan ti? Po mirë, ai ça do që i bën presion fshatarëve.
* * *
Besim Zika: Alo, kush je?
Telefonuesi2: Alo, shiko pastro magazinën se do vijnë për kontroll.
Besim Zika: Kush do të vijë, kush je ti?
Telefonuesi2: Po çdo ti, kush jam unë. Jam kushëriri nga deti. Alo, më dëgjo edhe njëherë. Pastro ça ke në magazinë dhe ik, mos më rri aty.
Besim Ziko: Pse mo?
Telefonuesi2: Pastroi të gjitha ça ke dhe ik, më dëgjon.
* * *
Telefonuesi1: Atë porosinë e ke siguruar ti, se i hoqën të gjitha këta. Do vijnë ata.
Besim Zika: Kush do vijë mo?
Telefonuesi1: Ata që andej, kishin ardhur me informacion. Kështu që i hoqën të gjitha ata.
