Ish kreu i Grupit Parlamentar të PD dhe një nga kundërshtarët e afishuar të Lulzim Bashës, ka reaguar me anë të një statusi në facebookun e tij, pas vendimit të Kuvendit Kombëtar për ndyrshimin e Statutit të kësaj partie që i jep përjetësisht mundësinë atij të drejtojë edhe nëse humbet gjithmonë zgjedhjet.
Duke e shoqëruar postimin me foton ku Berisha dhe Basha përqafohen në Kuvendin e PD, Patozi e ka shigjetuar ndoshta për herë të parë ish Kryetarin historik, i cili sipas figuracionit të përdorur me ngritjen e Murit të Berlinit, është “superfuqia” që lejoi “gjermanolidnorët” ta ngrinin Perden e Hekurt.
Lexojeni të plotë:
MES DEMOKRATËVE U VENDOS SOT PËRFUNDIMISHT “PERDJA E HEKURT”
Astrit Patozi
Mbajeni mend mirë këtë datë! Është dita kur historia e Partisë Demokratike pritet si me thikë.
Sot u legalizua gati me unanimitet kthimi në ndërmarrje private të një personi i forcës politike, që përmbysi diktaturën komuniste dhe udhëhoqi shumicën e proceseve transformuese të Shqipërisë në 28 vjetët e fundit.
Ndaj sot nuk është një ditë e zezë vetëm për demokratët.
Është ndoshta hera e parë në botë që një forcë politike mbledh Kongresin e saj vetëm për të ndryshuar statutin.
Dhe e konsideron këtë si një fitore, ndërkohë që nuk është mbushur ende viti, që kur statuti pararandës u flak botërisht në koshin e plehrave si një tefter pa vlerë.
Duhet të jetë me siguri rasti unikal në planet kur një parti e madhe e shkruan me dorën e vet 3 vjet përpara që do t’i humbasë zgjedhjet dhe se pas disfatës do të drejtohet sërish nga i njëjti kryetar. Këtë, të paktën, mund të na e kishin kursyer.
Mos u çudisni që u përpoqën më kot t’i shisnin disa diskutime kritike në Kuvend si shenjë e ndryshimeve pozitive që gjoja po ndodhin në Partinë Demokratike.
Lodhen kot, sepse e kanë pothuajse të pamundur që të gënjejnë njeri me ketë.
Sepse problemi ynë këto vitet e fundit nuk ka qenë kurrë se të ndalojnë të flasësh, por se nuk lejojnë që të dëgjohesh.
Për fat të keq, sot Partia Demokratike ngjason shumë me Berlinin e pasluftës, kur sovjetikët dhe gjermanolindorët morën vendimin për ndërtimin e murit famëkeq.
Ky Kuvend ishte perdja e hekurt të Lulzim Bashës për të ndarë demokratët dhe për të izoluar përfundimisht nga çdo gjë perendimore atë që ka mbetur nga Partia Demokratike e drejtuar prej tij.
Por të gjithë ne e dimë mirë se si përfundoi historia e Murit të Berlinit dhe e Republikës (së Re) Demokratike Gjermane.
