Ish-kryetari i grupit parlamentar të PD, Astrit Patozi, shprehet se kundërshtari duhet të mundet në betejë. Kjo është përgjigjja për dilemën e lindur në PD pas propozimit të ish-kryeministri Sali Berisha për djegien e mandateve të deputetëve opozitarë, pas zgjedhjes me votë të njëanshme të kryeprokurores së përgjithshme të përkohshme, Arta Marku.
“Është tregues shumë i qartë i dështimit të partisë demokratike, PD e nisi këtë vit me idenë e bojkotit të zgjedhjeve dhe po e mbyll këtë vit me mundësinë e djegieve të mandateve, pra një lloj vetëvrasje politike. Detyrimi i PD është ta mundin armikun në betejë dhe jo duke vrarë veten se mund të dëmtojë edhe kundërshtarin”, shprehet Patozi.
Është strategjia e tij që të mos ketë një projekt për të ardhmen por thjesht të zgjidhë çështjen e çastit dhe të momentit, në politikë kjo nuk çon gjatë. Ndërsa bashkëpunimin me LSI, ish-deputeti i PD e konsideron të shpejtë.
“PD nuk kishte asnjë urgjencë që të ndante opozitën, pra pushtetin moral të shoqërisë ta ndante me LSI kaq shpejt ndërkohë që asaj ende nuk i është tharë boja e vendimeve të marra për 8 vjet që ka qenë në pushtet”, thotë Patozi.
Prej muajsh në tavolinën e kryedemokratit Basha ndodhet një platformë, për të cilën Patozi thotë se nuk ka një përgjigje ende.
“Basha duhet të ketë një përgjigje për ne për dy arsye, e para se Basha është shkaktari i frakturës dhe rënies së rëndë që po kalon PD dhe duhet të ketë një qëndrim reflektues. Nëse Basah mendon se duke e vonuar dhe injoruar përgjigjen e kapërcen problemin është keqkuptim i tij. Sa kohë nuk ka një përgjigje ne kemi mundësi të shprehemi por kjo nuk mund të zgjase për shumë kohë”, thekson Patozi.
Dhënien e nënshtetësisë kryepeshkop Janullatos, ish-nënkryetari i PD e konsideron një vendim normal.
/Shqiptarja.com