Arta Marku, e cila prej rreth 1 muaji ka marrë detyrën e Kryeprokurores së përkohshme, i ka drejtuar një apel qytetarëve që të denoncojnë rastet korruptive.
Apeli është bërë përmes faqes zyrtare të Prokurorisë së Përgjithshme, ku u bëhet thirrje qytetarëve që të denoncojnë çdo lloj afere korruptive jo vetëm në prokurori por edhe në institucionet e tjera publike.
“Ftojmë të gjithë qytetarët që kanë informacione për abuzime të prokurorëve dhe të zyrtarëve të tjerë në çdo institucionin publik, të denoncojnë në këtë adrese postare”, thuhet në shënimin e prokurorisë.
Pas ardhjes së Marku në krye të këtij institucioni, edhe faqja zyrtare në internet ka ndryshuar, ku në vend të fotos së ish-kryeprokurorit Adriatik Llalla është vendosur shënimi në fjalë.
Kryeprokurorja e re e përkohshme u zgjodh me 69 vota të deputetëve socialistë, ndërsa opozita e kontestoi proccedurën duke e cilësuar si anti-kushtetuese.
Deri më tani, Kryeprokurorja ka bërë disa lëvizje në organin e akuzës, të cilat janë kontestuar dhe kundërshtuar edhe në gjykatë nga prokurorët që në bazë të urdhërit të markut duhet të lënë detyrat.
