Autoriteti Rrugor Shqiptar po kryen punime për rehabilitimin e një segmenti në aksin Gjirokastër-Kakavijë.
Ndërhyrja për ndërtimin e një ure në këtë rrugë, u bë pasi gjatë dimrit për shkak të reshjeve kjo rrugë përmbytej.
Drejtori i Autoritetit Rrugor Shqiptar, Afrim Qendro, sqaroi sot për mediat se nuk bëhet fjalë për trafik por për ngadalësim të qarkullimit në këtë aks. Sipas Qendros, zona ku ngadalësohet lëvizja është më pak se 1 kilometër.
Qendro ka kërkuar mirëkuptimin e qytetarëve që lëvizin në këtë rrugë, dhe ka shtuar se kjo ndërhyrje po bëhet për të shmangur përmbytjet në këtë rrugë.
”Jemi në postobllokun Lagjia Punëtore deri në Lazarat. Po rehabilitojmë rrugën sipas projektit. Ka nisur prej disa ditësh ndërhyrja. Nëse kthehemi pas në kohë, këtu ka patur probleme me përmbytjet. Përroi sjell inerte duke përmbytur rrugën. Pjesë e këtij projekti është dhe ky boks këtu. Duam të shfrytëzojmë kohën, me idenë që kur të nisin reshjet të jetë rregulluar ky problem. Për sa i përket menaxhimit, kemi ndërtuar një Bypass, ky aks ka qarkullim, pika është e monitoruar nga kontraktori. Ka një nivel trafiku, që unë do e quaja ngadalësim, jo më shumë se 1 km. Kërkojmë mirëkuptim nga qytetarët deri në 15 gusht”, ka deklaruar Qendro.
