Autoriteti Rrugor Shqiptar vijon me aksionin për mbylljen e hyrje-daljeve të rrezikshme, ku në aksionin sot në Maminas në aksin Tiranë-Durrës pati edhe prezencë të shumtë të policisë, për shkak të kundërshtimit të pronarëve të bizneseve.
Ata shprehen se mbyllja e këtyre hyrje-daljeve ua bën atyre të pamundur zhvillimin e aktivitetit për shkak se rruga dytësore për t’u futur në ambientet e biznesit, është shumë larg.
Sipas tyre janë njoftuar më herët nga ARRSH për nisjen e aksionit, por shtojnë se e kanë të pamundur gjetjen e një zgjidhje alternative në mënyrë që të zhvillojnë normalisht aktivitetin dhe se aplikimi dhe pajisja me leje është një procedurë që zgjat shumë.
ARRSH po hap kanale anësore të mbyllura nga bizneset në anë të rrugës dhe po vendos mbrojtëse anësore metalike për mbylljen e hyrje-daljeve, duke i lënë bizneset pa rrugë alternative për t’u futur në ambientet e tyre. Në aksin Tiranë Durrës janë 300 subjekte me hyrje-dalje të rrezikshme ndërsa në të gjithë vendin numërohen 1300 subjekte që kanë akses në akset nacionale në vend dhe vetëm 60 prej tyre janë të licencuara dhe kanë marrë leje për përdorimin e rrugës. Ky aksion i ARRSH ka nisur që me 27 nëntor.
