Një prej personazheve më të njohur të botës së krimit në Elbasan, Dashnor Dumani, vëllai i Nuredin Dumanit, është arrestuar në Dubai. Ende nuk dihet se në cilën datë është arrestuar në “parajsën” ku fshihen bosët e krimit, por Policia e Shtetit informoi se tashmë kanë finalizuar procedurat për ekstradim dhe Dashnor Dumani do të mbërrijë në Tiranë pasditen e sotme.
Dumani rezulton i dënuar për armëmbajtje pa leje dhe po ashtu i akuzuar nga GJKKO, për vrasje dhe për vjedhje me armë. Ai ka qenë pjesë e Masakrës së Bradasheshit në vitin 2018, ku u vranë 3 familjarë të Erion Alibej.
Marrëveshja për ekstradim është arritur edhe për një prej anëtarëve të organizatës së Çopjave. Armis Stafa alias Armees Stava, 36 vjeç, nga Elbasani, u arrestua më 27 maj në Dubai, pasi rezulton në kërkim për dosjen “Plumbi i Artë 2”, në të cilën u goditën Çopjat. Roli i tij ishte të pastronte paratë e kësaj organizate kriminale përmes tregtisë së makinave.
Njoftimi i Policisë së Shtetit
Si rezultat i bashkëpunimit shumë të ngushtë me partnerët në Emiratet e Bashkuara Arabe, pritet që gjatë ditës së sotme, të finalizohen procedurat për ekstradimin nga Dubai, në Shqipëri, të shtetasve të shumëkërkuar, pjesëtarë të organizatave kriminale:
– D. D, i dënuar për armëmbajtje pa leje dhe i akuzuar nga GjKKO-ja, për vrasje dhe për vjedhje me armë;
– A.S, i akuzuar nga GjKKO-ja, se ka pastruar paratë e një grupi kriminal në Elbasan.
